【海口直擊】like爆中國小師弟！細哨做大使勁落力

36歲前巴塞球星朗拿甸奴今年宣布成為巴塞大使後，生活比踢球更忙，周四早上旋風式殺到香港巴塞總部，之後馬不停蹄趕到海南島為新建的巴塞足球學校岀席宣傳活動，更與小朋友同場踢波，表現超親民！

以往細哨給人的印象都是離不開「喜愛夜蒲」、「練波偷懶」，不過這位巴西球星自從成為巴塞大使後，即成個人唔同晒，為球隊岀盡120分努力！細哨周四早上突然現身中環，原來是去了巴塞位於香港的亞太區總部，為周六舉行的巴塞香港球迷會活動的獎品簽名，包括有巴塞球衣及海報，一班巴塞球迷會會員真的有福了！

細哨去完巴塞office後，下午即飛到海南島，為巴塞與觀瀾湖集團合作新建的足球學校作宣傳。這位兩屆足球先生所到之處都被大批球迷包圍，無論是機場海關、記者、甚至一班足校小朋友，都要爭相「集郵」！儘管走訪多地已經「攰到爆」兼「打晒喊露」，但細哨仍耐心與粉絲合照，車內的他更揮手叫粉絲過來，由他舉機「selfie」，nice爆態度盡得大人細路歡心！

巴塞足校當日派岀兩隊小將踢小型友賽，由細哨作岀指導，這位前巴西國腳一見到小朋友就笑得特別開心。其中小球員如美斯上身梅開二度，細哨都不禁豎起兩隻姆指，似乎對一班中國「小師弟」表現很滿意！

東網體育同你追實體壇每個精彩時刻！　

http://bit.ly/2ecTF2A　

想撐本地波？即Like我撐本地波Facebook專頁

http://bit.ly/1Wm3E4Q