桂神最好傾　攞到佳績都要識急流勇退

金句：光榮何價？人生起落無常、切忌懷勉過去！

李斯特城主帥雲尼亞里，上季奇迹帶領一支1賠5000嘅球隊，史無前例登上英超冠軍寶座。不過今季「狐狸」還未跌到聯賽榜尾3位置，泰國班主就狠心將佢炒魷，證明英超領隊呢份工起伏絕對無常。所謂仁慈鬥唔過心狠手辣，Peter會為雲帥難過，但足球就係咁殘酷。因此Peter永遠唔留冠軍獎牌，努力爬上高峰，然後就急流勇進，永不懷勉過去光輝。

Peter本身學習外國體育文化足半個世紀，永遠唔當攞冠軍、獎牌係咩一回事，若然你千辛萬苦地以「庶渣價錢，燒鵝味道」攞到佳績，更應該急流勇退，靜下來休養生息，唔好太過好勝。Peter唔係話雲帥好勝，所講嘅問題係急流要識得勇退，起得愈急跌得愈痛，但呢個行業最緊要有明天，只要有球隊垂青，Peter相信輿論界同傳媒會重新平衡返雲里亞尼嘅功業。

雲尼亞里執教經驗豐富，就算今時今日被炒，以其年紀和所得到嘅補償，如果Peter係雲帥就暫時唔教波住，返去祖家坐喺橄欖樹下，享受地中海陽光普照嘅氣候，同兒孫一齊玩樂安享晚年先，因為佢係一個傳奇人物，傳奇嘅故事自然有勝有敗！

分題:上季幸運促成雲帥今季不幸

其實Peter喺8月時嘅英超展望講過，李斯特城上季神奇奪冠，若然今季拎到前10名都算超額完成，尤其係賣埋中場尼高路簡迪。要知道李斯特城呢單交易袋咗3,000幾萬鎊，歐聯應該都賺到2,000萬鎊左右，加上球隊冇點貴價買入新兵，佢哋賺嘅錢唔會少，但泰國老闆唔會同你講人情，當交唔到成績甚至有機會降班，就自然會聽埋坊間嘅閑言閑語，促成雲帥捱唔到季尾就要走人，可以話上季嘅幸運促成今季嘅不幸。

東網體育同你追實體壇每個精彩時刻！　

http://bit.ly/2ecTF2A