世錦賽首次踩真雪 佢話畀你聽咩叫毅力！
20170225
東網電視
更多新聞短片
如果你未掂過草地，敢唔敢去參加世界盃？如果你未見過鑊鏟，又敢唔敢去參加廚神大賽？好多人嘅答案都係否定嘅。不過呢個委內瑞拉人無畏無懼，就算成世人未試過喺真雪練習，但一樣膽粗粗去參加滑雪世錦賽。雖然最後於資格賽包尾而回、又被封為史上最差滑雪選手，但佢一樣冇放棄夢想，希望有朝一日，代表國家參加冬季奧運會。
蘇蘭奴迷上滑雪運動後，就好希望去參加比賽。但位處南美嘅委內瑞拉，因為天氣炎熱唔會落雪，蘇蘭奴完全冇機會於真雪上練習，平時只能用滑輪操練。2017年芬蘭世界滑雪錦標賽於2月舉行，蘇蘭奴1月就想經法國到瑞典進行特訓，但法國認為佢只係想尋求疪護，所以拒絕佢入境，令佢於正式比賽前，根本未練習過。
如果係你，會唔會就咁算啦呢？蘇蘭奴就話畀你聽佢唔會。日前於10公里越野滑雪資格賽入面，蘇蘭奴出晒醜，佢全程跌跌撞撞，好多時根本唔係滑雪而係行雪，整個過程完全冇試過全速衝刺，最後佢用咗37分39秒，去完成頭3.5公里賽程，而呢個時間，其他選手而完成成個賽程。呢個比賽完成唔到唔緊要，佢繼續挑戰1.6公里資格賽，最後雖然排156名攞包尾成績，但總算賽畢全程。唔少評述員，由初頭笑佢係史上最曳選手，去到最後都為佢打氣，因為蘇蘭奴表現出嚟嘅體育精神，比佢嘅成績可貴得多。
蘇蘭奴話，好多謝委內瑞拉政府支持佢參賽，雖然去唔到瑞典實習，但完全唔係國家問題。雖然佢喺社交網度，話自己表現「尷尬」，但冇考慮過放棄：「我完成咗其中一個夢想！滑雪運動每日都推動我去努力嘗試，希望有一日，可以代表到國家參加冬季奧運會，我一定會努力！」
東網體育同你追實體壇每個精彩時刻！