【我有嘢講】生性!「螳螂」謝敏榮酒徒變煮飯公

2017年03月13日 00:11
東網電視
更多新聞短片
謝敏榮:「仲想有人為我鼓掌!」

精神啲!臨時演員都係演員,後備球員更有可能變奇兵!東方龍獅接連遇上傷停考驗,相隔15年再登亞冠盃舞台的「螳螂」謝敏榮有望再次臨危受命,頂替迪高的防守中場位置。曾經遊戲人間,重傷過後方知歲月不留人,留着十年如一日髮型的「螳螂」珍惜當下:「我仲想有人為我鼓掌!」

「唔講我都唔記得自己今年34歲,可能後生一輩球迷仲以為我係年輕球員!」那些年的髮型與《少林足球》會耍「螳螂拳」的閒角似到十足十,從此「螳螂」兩字便成了謝敏榮的代名詞。輾轉十數年間贏過聯賽冠軍、入選過香港隊,今時今日髮型依舊,縱然未嘗主角光芒,當東方龍獅在近兩場亞冠盃分組賽遇上傷停考驗,正正也是這位百搭老將,成為最佳「替工」人選。繼在上場主場對川崎前鋒代替停賽的23歲左閘黃梓浩,周二(14日)晚對水原藍翼也有望串演防守中場,頂替因傷缺陣的迪高。哪怕難關重重,「螳螂」亦時刻笑容滿面,回想曾經讓他缺戰一季、幾乎收山的膝傷舊患,亦只是輕鬆形容為「十字韌帶斷咗之嘛」,是與世無爭,還是冇乜鬥心?「螳螂」自解說:「細個好多人覺得我掛住玩、唔認真、乜都冇所謂,不過冇乜所謂都有好處,就係唔會諗嘢鑽牛角尖,遇到唔順境時刻都唔會畀自己『Hea』落嚟。」別忘了「螳螂」還有另一花名叫「牛榮」,還真有點像牛般任勞任怨。

「牛榮」早在15年前已曾在未改制的亞冠盃舞台後備登場,昔日新丁曾經蓄勢待發,未及珍惜卻迷失在青蔥歲月中。「嗰時我喺體藝中學同李志豪係同班同學,佢雖然留班大我一年,但係踢波已經好勁,成日畀飛我哋入旺角場睇佢。到後尾加入南華青年軍,『木嘴Sir』(即顧錦輝)只係升咗我、梁子駿同郭建邦3個上一隊,嗰時競爭好激烈,唔係你想踢就有得踢。諗番起當年一路走嚟都算順利,可能係咁冇去好好鍛鍊自己,將時間用晒去玩、去飲酒。」曾經酒友逐一成家立室,「牛榮」亦向拍拖多年的中學同學女友「阿Lam」求婚成功,昔日酒徒竟變煮飯公!

「女友每次見到我飲酒都好擔心,到早幾年加盟東方,教練團不斷提醒我已再唔係十八廿二,再係咁飲落去,好難會踢番起。而家嘅我生活規律咗好多,練完波係時候去買餸幫手煮飯。」有了妳即使平凡卻最重要,就算去年再次傷膝長唞半年,「牛榮」依然咬緊牙關走過來:「受傷日子會去做gym舉鐵,換轉以前應該攤咗喺屋企瞓覺。我唔知自己仲可以踢幾耐,但每一次落場,我都會好好珍惜,起碼畀大家仲記得我個名!」