歐洲金靴勢掀神鋒革命 3大奇兵圍攻美斯

歐洲球壇風雲變色，迎接神鋒降臨！繼上季李斯特城爆冷捧英超冠軍之後，今季輪到個人項目又有「奇迹」！3位原本唔起眼嘅二線兵：巴斯杜斯、比洛迪、莫迪斯迪大爆發，瘋狂數胡，唔經唔覺已經擠身今季歐洲金靴榜前5位，直逼阿根廷球王美斯，甚至可望一舉打破美斯、C朗、蘇亞雷斯包辦近7屆金靴獎嘅壟斷局面，加冕為新一代超級射手王。

歐洲金靴獎計算方法，以球員聯賽入波數字，乘以一個「聯賽系數」，最高分者獲獎，例如歐洲排名最高5大聯賽，每個入球可以乘2分，巴塞球星美斯今季西甲暫時有25球進帳，就係25球乘2，等於50分。

當大家以為今年又係美斯、C朗、蘇亞雷斯之爭時，咁就錯晒啦，C朗跌晒Watt，僅有19球進帳，比美斯少6球，睇怕都好難追。上屆得主「哨牙蘇」腳風亦唔多順，落後美斯3球。反觀，巴斯杜斯、比洛迪、莫迪斯迪靜靜起革命，荷蘭國腳巴斯杜斯今季由禾夫斯堡加盟士砵亭，表現如有神助，喺聯賽已轟入24球，由於葡超球隊實力懸殊，換言之巴斯杜斯有較多機會喺弱隊身上數胡，反超前美斯，絕對唔奇。

比洛迪、莫迪斯迪冒起最令人驚喜，23歲意大利國腳比洛迪多得拖連奴新帥米赫洛域主攻戰術，令佢入波數字急速上升，上季聯賽上陣35場只入12球，但今季披甲24次，已經入22球，以拖連奴嘅有前冇後踢法，比洛迪有力挑戰「30+」關口。

奧巴美揚僅1球領先莫迪斯迪

至於科隆前鋒莫迪斯迪以22球排德甲射手榜第2位，落後奧巴美揚1球，以科隆嘅平庸實力，莫迪斯迪有呢個入球數字，已經非常難得，證明德甲並唔係奧巴美揚同羅拔利雲度夫斯基玩晒。

東網體育同你追實體壇每個精彩時刻！　

http://bit.ly/2ecTF2A