英超 高圖爾斯買狗仔媾女 外父：轉會先講
20170410
東網電視
更多新聞短片
車路士「賤男」泰拔高圖爾斯日前證實，佢同正陀住自己骨肉嘅女友Marta分手，正當泰拔高圖爾斯強調會盡番做爸爸責任，勢估唔到咁快已經忍唔住出手獵食！英國《太陽報》爆料，呢位比利時國腳最近喺Instagram向一位叫Delaney Royle嘅靚女展開攻勢。
18歲嘅Delaney係一位狗仔保母，泰拔高圖爾斯就睇準機會，知道女方特別鍾意松鼠狗，竟然為咗媾女專登自己走去買一隻，並且用呢個話題成功「搭線」，最後仲請埋Delaney幫手，喺佢出外比賽嗰陣照顧自己隻松鼠狗添！
不過隨住泰拔高圖爾斯攻勢愈趨猛烈，Delaney嘅爸爸就愈睇唔過光，原來51歲嘅Jonathan係韋斯咸忠實粉絲，佢接受《太陽報》訪問就即刻落閘：「Delaney同嗰個車路士球員並冇拍拖，如果有一日佢同球員拍拖，都只可以係韋斯咸球員，其他球隊嘅人唔使旨意，呢個係我哋嘅規例！」換句話講，即係泰拔高圖爾斯如果轉會韋斯咸，就可以同Delaney拍拖啦！
東網體育同你追實體壇每個精彩時刻！