亞冠盃　旺角場爛地侍候！大菲踩草擰晒頭

旺角大球場變爛地，搞到「大菲」史高拉利擰晒頭? 港超「一哥」東方龍獅將於星期二(25日)晚的亞冠盃分組賽主場硬撼廣州恒大。該支中超「土豪」周一(24日)早上才由廣州殺到香港，下午隨即拉隊到旺角場操練。隊長鄭智、保連奴、高拉特及張琳芃等主力悉數隨隊，而在首循環因傷缺陣的國足後衞馮瀟霆亦可如期候命。由於恒大在3連和後己跌至G組次名，為保提前出線，可已預期明晚定必狂攻東方龍獅。

廣州恒大曾在天河主場大炒有2人被逐的東方龍獅7蛋，不過今次回到狹小的旺角場作戰，有機會考起「大菲」史高拉利，皆因經連日天雨影響下，旺角場雖未現積水，卻明顯略見泥濘濕滑。大菲更特別提前30分鐘出草地踩場兼踢球，親身測試皮球運行情況，惟之後與場監「肉緊」傾到擰晒頭，是否不滿旺角場的場地情況，便要留待大菲於稍後的記者會開金口才能得知了。