【花生擂台】「最佳金球+撲救」堅公投!

20170505
東網電視
更多新聞短片
「2016/17香港足球明星選舉」嘅網上投票,將會喺5月7日(星期日)晚上11點59分截止,大家投咗你嘅神聖一票未?其實除咗「最受球迷歡迎球星」、「最佳年青球員」、「最佳足球明星(11人)」、「最佳教練」同「香港足球先生」大家係有Say之外,各位亦可以用你哋嘅一票,去決定呢個球季「最佳金球」同「最佳撲救」得主誰屬。「車路士足球學校(香港)X 東網 2016-17中銀人壽香港超級聯賽」嘅「最佳金球」同「最佳撲救」選舉,將於5月7日凌晨零時開始,公開接受投票。
今季已經係東網第二次主辦「港超聯公投」,今季獲得車路士足球學校(香港)嘅支持下,「最佳金球」同「最佳撲救」兩個獎項嘅候選名單,由首季嘅各20個,大幅增加到各30個。所有候選「金球」同「撲救」都由專人喺港超揭幕戰(2016年8月26日),到「煞科」(2017年5月6日)期間嘅賽事中揀選出嚟,趁投票仲未開始,不如先同大家介紹一吓候選名單啦!
巴閉!楊賜麟2隊波2個候選
「最佳金球」30個候選名單中,最巴閉嘅相信都係「賜B」楊賜麟喇,點解咁講?事關上半季效力標準灝天嘅佢,喺上年9月24日喺主場斧山道運動場,入嘅一個炮彈式入球,一早成為候選;季中轉會香港飛馬嘅佢,喺今年4月1日對東方龍獅嘅聯賽,接應林樂勤嘅妙傳入嘅靚波,亦都成為候選,一季之內踢兩隊波有兩個候選,仲唔係最巴閉?
「賜B」兩個候選「金球」風格完全唔同,一個狂抽、一個玩角度,其實其他候選「金球」都各具風格,好似第一時間「窩利」咁,香港飛馬嘅「BB」黎洛賢同東方龍獅嘅「儍邦」梁振邦就各有一球候選。上季憑一個「蠱惑角球」入波成為候選嘅香港飛馬中場迪亞高,今季就有兩個候選,一球係遠射、一球就靠同隊友美妙嘅組織。咁個人突破呢?梗係有啦!「扭扭昌」黎耀昌喺聯賽首循環替理文流浪兩破南華大門,其中「埋齋」嗰球,唔係無得候選嘛?
神「龍」會爭崩頭
至於「最佳撲救」,預期目前喺「2016/17香港足球明星選舉」,「最佳足球明星」守門員位置上票數爭持激烈嘅東方龍獅門將葉鴻輝,同冠忠南區門將謝德謙,同樣會鬥得精彩,因為兩人嘅高難度撲救都同樣有份候選。港會雖然護級失敗,但門將馬浩龍嘅演出,一直廣受球迷讚許同「行家」認同。當然仲有喺「富力地產菁英盃」決賽,施盡渾身解數嘅門神香港飛馬基斯贊,同和富大埔保羅啦,最後邊個會跑出,真係好難估呀!
各位球迷朋友,「車路士足球學校(香港)X 東網 2016-17中銀人壽香港超級聯賽」嘅「最佳金球」同「最佳撲救」選舉,由5月7日凌晨零時到5月15日正午12時,接受公眾投票,到時大家將可以透過東網on.cc網站同app,同埋東網體育同我撐本地波兩個facebook專頁,去到公投頁面投票。
「最佳金球」同「最佳撲救」兩個獎項將會喺5月17日「2016/17香港足球明星選舉」頒獎典禮上公布結果同頒獎。