【亞冠盃直擊】東方龍獅吞川崎前鋒4蛋

亞冠盃分組賽G組最後一輪賽事，主場出擊的日職球隊川崎前鋒，以4比0擊敗東方龍獅。由於同組的廣州恒大在另一場分組賽和波，令川崎前鋒最後得以小組首名出線。

賽前已篤定出局的東方龍獅，是役除有李康廉因傷未有隨隊外，正選門將兼隊長葉鴻輝亦因發燒未克披甲，需由今季未嘗上陣的梁宇昊代為把關，而季後掛靴的「亨利」鄭少偉則先列後備。

上半場28分鐘，主隊後衞車屋紳太郎助攻，爆落左邊底線傳中，梁宇昊出迎打手槌落空，伏兵遠柱的拉爾拿亞一聲唔該，將皮球送入空門，替川崎前鋒領先1比0。落後下的客軍，不斷試圖反撲，但麥基和洛迪古斯先後錯失埋門機會後，於43分鐘再失一球。主隊「喼頓」谷口彰悟，接應隊友右邊開出的角球，頭槌破網將比數改寫成2比0完上半場。

換邊再戰僅2分鐘，東方龍獅便輸到0比3，拉爾拿亞右邊爆贏謝敏榮後傳中，長谷川龍也快鄭璟昊一步，將皮球剷入網，將比數拉開。63分鐘，中柱憲剛右邊開出角球，後衞奈良龍樹追柱衝頂入網，替川崎前鋒領先至4比0。

大勢而去的東方龍獅，在75分鐘由「亨利」入替徐德帥，及後再以吳偉超入替曾至孝，惟始終未能將戰果改寫。東方龍獅最終以0比4敗陣，並以1和5負完成今屆賽事。