港超奧斯卡　阿輝攞獎：受之有愧

東方龍獅今季雖「四大皆空」，不過仍有5名球員當選「2016/17香港足球明星」最佳11人陣容，當中門神葉鴻輝以些微票數力壓曾刷新聯賽連續不失球紀錄的謝德謙當選最佳門將，算是最為意外。自2010年後連續8年當選的「英雄輝」直言「受之有愧」，在台上連稱不好意思，但一番風度感言仍贏得不少網民正評。

東方龍獅今季聯賽失球達25個，特別是季尾頻頻失守，去年當選香港足球先生的「阿輝」在台上獲獎時已直言今季表現不值獲獎，更表示「知名度不代表一切」，他其後在接受傳媒訪問時亦未見歡容:「其實一路赴會嘅時候都好驚自己會得獎，因為喺我心目中，今季有更多其他守門員比我更值得，好似傑志嘅王振鵬全季表現都好穩定，失球亦係全季最少，我覺得好對佢、仲有阿謙(謝德謙)唔住。(知名度幫你得獎？)我自己都唔識得講，我喺台上都話作為運動員，知名度唔代表一切，有球迷支持固然高興，但我更希望大家投票畀值得攞獎嘅球員。」

「阿輝」坦言東方龍獅今季未能奪標，對他及球隊也是低潮，唯望下季提升狀態捲土重來。被問到會否因為今季表現，令他的港隊首席門將位置感到威脅，「阿輝」表示：「其實我一直都唔覺得自己個位置係大家所諗咁穩陣，無論有冇獎攞都好，我都會保持住不斷進步做到最好嘅心態警惕自己。」

至於失獎的謝德謙則獲靚靚老婆「呵番」，直言「預咗」的他平常心以對：「其實由始至終我對獎項唔算太上心，而且我從來未試過入到最後兩強，今次獲得唔少球迷支持，我覺得贏咗架喇！」對於阿輝的台上感言，阿謙亦大讚對方大體，兩位門神識英雄重英雄。