【利市直擊】紅軍創會125周年 球迷瘋搶新貨

英超今周煞科，相信各位利物浦及阿仙奴球迷都「坐唔安、瞓唔樂」，皆因兩隊仍為第4位爭持激烈，紅軍只要喺主場擊敗已篤定降班嘅米杜士堡，即可穩奪歐聯資格！大戰前夕，本報記者親身去到利物浦，除咗追蹤周日喺晏菲路球場舉行嘅「渣打5人挑戰盃」總決賽，亦都特別視察賽前情況，發現當地「利迷」喺周五（5月19日）全新主場波衫開售第1日，已經仆到去搶衫，至於限量嘅125周年版波鞋，更加係一開賣已經被搶購一空，相比起「拍烏蠅」嘅愛華頓精品店「Everton Two」，好似舖名咁講，利物浦的確人氣爆燈，係真正嘅「利市一哥」！

小記星期五去到位於利物浦市中心大型購物中心Liverpool One嘅兩層專門店，見到門外櫥窗已經展示緊全新嘅主客波衫，其中紅衫白領嘅主場球衣玩復刻，參照紅軍輝煌歲月70年代嘅經典款，心口嘅主贊助商渣打銀行Logo亦都由黃變白，更加醒目，唔少利迷都「直豎姆指」，公開發售第1日已經吸引當地利迷迫滿專門店買衫，店方亦都喺2樓整咗成面「波衫牆」，無論主場作客，大人裝定童裝、有印字定無印字，全部任揀。淨賣波衫當然唔夠啦，新波衫一出，同款嘅坐墊、啤啤熊、鎖匙扣、BB口水肩都悉數面世，實行男女老幼通殺，係掂嘅。