通天波男2.0　理文自立門戶 晨曦加入戰團

啱啱個星期六晚咁多盃賽決賽睇，係唔係好過癮呢？「波男」嗰日就由下晝開始過癮喇，因為入咗旺角場睇東方龍獅對冠忠南區嘅季後附加賽決賽。完咗場，「波男」同幾個老友都無即刻閃，留喺看台睇住「淚眼亨利」同隊友、球迷話別，仲睇住佢畀幾個「四眼哥」剝光豬，攞晒啲波衫褲去留念，睇嚟踢咗15年職業波嘅「亨利」都幾有觀眾緣喎。

同全世界嘅聯賽一樣，港超聯球季完咗都會刮起「季後風」，「波男」同一般球迷無分別，最想知嘅不外乎幾樣嘢，好似下季到底有幾多隊？有嘅咩轉會消息？邊度睇直播？就等「波男」喺度同大家分享吓有咩「季後風」收到啦！

首先，新季到底有幾多隊呢？聽講雖然有聲音希望可以多過12隊，但因為考慮到球場同其他配套，新一個球季應會按照原定計劃由12隊組成。依家就數數喇喎，傑志、東方龍獅、冠忠南區、南華、九巴元朗、和富大埔、香港飛馬同R&F富力8隊，之外「標準」會同「流浪」重新合體，「理文」就畀錢自立門戶，咁用標準灝天名義嘅「港菁」又點呀？一如早幾日「文仔」喺「大哨」嘅活動上爆料，「港菁」會籍已經賣咗畀前港甲「6碼射手」梁智駒。

聽講喺英超伯明翰學過法嘅「阿駒」，家陣除咗搏命搵贊助，更加搏命搵本地球員，講真吖！新一季搵本地球員可能難過搵贊助，事關就咁數都11隊喇，仲有盛傳會重返頂級聯賽嘅晨曦呢？外援有錢實搵到返嚟，但本地球員就有錢都未必簽得到喇，睇嚟「阿駒」同「理文」除咗靠借，都要打埋已轉踢港甲嘅前職業球員主意喇。

富力大搞施銀彈撬人

講開搵球員，除咗幾支爭霸分子外，早幾日畀「梁主席」爆料會大搞嘅R&F富力，聽講亦已經出手，施展銀彈政策去斟一啲具本地球員資格嘅歸化兵，同埋一啲有質素但無乜機會嘅華將，聽講上季踢理文流浪周綽豐，已落實新一季會同曾健晃做隊友。

至於下季喺邊度睇直播，季後附加賽決賽嗰日，「波男」喺老友介紹下，認識咗喺東網on.cc講波嘅「替工大頭」，問佢下季係唔係繼續，佢就笑笑口咁話等緊啲球會向足總表達意願，好大機會到下個月中就會有結果，希望大家繼續支持佢哋播波喎。

想撐本地波？即Like我撐本地波Facebook專頁

http://bit.ly/1Wm3E4Q　

東網體育同你追實體壇每個精彩時刻！　

http://bit.ly/2ecTF2A