【有片】超催淚！勁感人！王子托迪掛靴夜
20170529
東網電視
更多新聞短片
【睇片】六萬球迷喊爆 托迪掛靴勁感人:http://bit.ly/2s5LIky
意甲今晨煞科，羅馬王子托迪喺賽後亦都正式結束佢25年職業球員生涯！One Life One Club，球員生涯只曾效力羅馬一間球會，呢位著名意大利國腳傳奇球員生涯，今晨喺多達6萬位球迷於奧林匹高球場見證下，正式結束。整個過程同儀式都超感人同催淚，就算係唔係托迪球迷都好，今日你都會被佢感動，為佢嘅完美球員生涯感到敬佩，同向佢送上祝福！
羅馬今晨對住熱拿亞，賽前托迪先走去坐滿死忠羅馬粉絲嘅南看台，向支持者敬禮。喺同一眾超級Fans合照之後，呢位羅馬隊長走去後備者，為今場賽事做準備。羅馬主帥史巴列堤喺今戰54分鐘將托迪換入場，即刻張球場氣氛推上高峰。值得一提，今季將托迪長期擺喺後備席嘅史帥，以及被指向托迪施壓逼佢掛靴嘅班主柏洛達，當被介紹出場嗰陣，就畀現場羅馬球迷大喝倒采，場面勁尷尬。
場波最後由羅馬贏3比2，呢支首都球隊拎到聯賽亞軍，托迪亦正式展開佢嘅告別騷。托迪賽後公開致辭話：「非常可惜，終於都嚟到呢一刻，我每日都有喊！呢個係我同家人一齊做嘅決定，我都好想可以留多喺度25年，多謝羅馬！」王子仲澄清近排有關佢會轉會延續球員生涯嘅傳聞，話希望球迷支持佢掛靴嘅決定。
係結束托迪嘅掛靴儀式之後，一件超巨型嘅羅馬托迪10號波衫就出現喺球場正中，所有羅馬球員亦同時着起托迪嘅波衫，而球場大銀幕都打出感謝隊長嘅字句。之後托迪就抱住佢嘅細女Isabel，然後喺另外兩個仔女同老婆陪同下，喺球場跑道繞圈向球迷作最後道別，期間仲試過停步望住個看台，再相擁愛妻Blasi流淚，場面令人感動。
連同今場賽事，托迪嘅球員生涯喺各項賽事合共為羅馬上陣786場，喺意甲球壇歷史上排第3多，僅次於馬甸尼(902場/AC米蘭)同辛尼迪(858場/國際米蘭)。至於佢合共喺意甲射入250球，只係較史上紀錄保持者皮奧拿(1929年至1954年)少24球，而現役球員之中，更係未有球員累積入球能突破200個。托迪嘅偉大成就，真係唔到你唔服呀！
東網體育同你追實體壇每個精彩時刻！