港隊Exit Interview!陳偉豪希望阿仔接班

20170606
東網電視
更多新聞短片
離別,不一定代表傷感。從大膽提攜的利沙雲說到火花四濺的金判坤,由與最佳拍擋李志豪出生入死到指導後輩徐宏傑,回首17年港隊生涯,35歲的陳偉豪談笑風生,即使效力的南華落入自降甲組厄運,將於明晚畫上港隊生涯句號的「豪哥」仍拒絕言退:「我一定會同南華捲土重來。」
教練篇:同Kim Sir鬧交建感情
闊別兩年重來港隊操練,陳偉豪招牌的「嘈吵聲」與提場聲響亮依然,難怪連「Kim Sir」金判坤也直言不捨。「咁多年無論係港隊定球會教練,我同阿Kim最有火花,因為我哋成日鬧交,但每一次都係我主動Say Sorry,再心平氣和解決問題。」從流浪到南華至港隊三度合作,Kim Sir的確與偉豪特別有緣,即使近年港隊位置漸被入籍猛將代替,偉豪亦無怨言:「足球就係咁現實,冇成績就要問責,阿Kim聰明在熟悉香港球圈運作同球員特點,建立咗成績先去推行自己一套,唔似以往有外國教練一嚟到就硬推自己style,自然唔易成功。」
時光回到18歲,初出茅廬的偉豪與同齡的李志豪,齊被初來報到的荷蘭籍主帥利沙雲徵召,無奈後者不足一年便敗走香港。「烈士多數都係短命啲!最記得有場對羅馬尼亞嘅千禧盃,佢派晒我、李志豪同吳偉超3個新仔落場,結果雖然輸2比4,但令我哋成長幫助好大,只可惜用後生仔就要賠上成績,所以唔怪得晒阿Kim會以能力較高嘅入籍兵行先。」偉豪不諱言,從前港隊認受性低,每逢大賽也是「操幾課就去踢」,還有說不清的選人制肘,唯獨「青訓之父」黎新祥的硬淨手腕,令所有港將也心悅誠服:「黎sir年代香港隊唔算有好多戰術變化,但佢唯才是用,唔會受外人閒言影響,所以我哋每一個都咁尊重佢。」
隊友篇:代隊友出頭 喜見虎哥變貓爸
代表港隊出戰,從來也是「輸少當贏」,皇馬訪港坐爆大球場,主場出擊的港隊卻被噓爆。即使兩年前的世界盃外圍賽,連場紅海湧現吶喊歡呼,始終難逃熱潮冷卻命運。不過無論是昔日負責「執波擔水」的「掹車邊」新丁,還是臨別在即的老大哥,偉豪仍對港隊戰衣甘之如飴,除了使命感,還有更重要的兄弟情。「15歲踢青年軍已經同李志豪並肩作戰,大家一個眼神已經心領神會。不過細個時候血氣方剛,試過喺港隊幫隊友出頭被逐出隊,漏夜執行李返香港,今時今日大家圍埋一齊變咗講湊仔,你話神唔神奇!仲有大眼仔(黃展鴻)當年喺屋邨帶我踢波、肇麒就睇住佢由壞孩子變成熟,呢份出生入死兄弟情,先係最難忘。」
港隊過去10年也是由「雙豪」撐起防線,說到華將中堅接班人仍是寥寥可數,偉豪寄語「畀啲時間」:「如果講足球知識,而家呢代比我哋更豐富,後衞講求用波,唔似以前只踢爛仔波,好似徐宏傑同胡晉銘都好聰明,梁諾恆亦有身型,只係踢南華唔係你有能力就踢到,仲要識得去應付壓力,唔可以單單用一、兩場表現去衡量。同入籍兵比身體質素當然冇得比,唯有自己踢得聰明啲,知道教練想要乜,落場11個球員未必係最好波11個,但一定係最能夠執行到教練指示。」
展望篇:港隊基地落成在望 盼阿仔接班
球場難忍英雄見白頭,南華今季表現低迷,身為精神領袖的偉豪也難逃捱批,惟在「少林寺」宣布自降甲組之時,這位鐵血隊長仍堅持共同進退:「做球員,其實永遠都唔會知道邊場先係自己最後一場。由細到大,我自問唔算最好波,但能夠踢到今時今日,時間就係最好證明。你將35歲嘅我同25歲時比較,當然係冇得比,我係年紀大咗,但伴隨住嘅經驗亦令我唔會好似後生時亂跑。今年係我效力南華第10年,有得揀我都希望能夠喺南華掛靴,即使下季要轉戰甲組,只要南華需要我,我一定會遵守合約精神,幫南華一步一步踢番上嚟。」
面對未知將來,偉豪輕鬆以對,但說到17年港隊生涯,始終有憾:「由我入港隊已經話起訓練基地,到我退出都仲未落成,只可以講我輸咗畀佢哋(政府)!政府如果有心執行,點解會拖咗十幾年?將軍澳呢十幾年都起咗幾萬個單位!既然我無福消受,唯有希望將來我兩個仔有機會可以踢到。」走過球市黑暗低谷,見證世盃外全城哄動,笑看港足起落17年,陳偉豪依然有火,未是時候說再見。