【有片】瑞典托禾倫中場線入空龍High到喊

即睇托禾倫中場線補時絕殺：http://bit.ly/2s6wIp1　

搞邊科？龍門去咗邊？世盃外歐洲區A組今晨上演嘅瑞典主場對法國，雖然全球球迷普遍睇好「高盧雞」可以攞3分，點知最尾佢哋原來係3分全失先真！話說場波去到補時3分鐘，雙方仲係和緊1比1，點知法國門將洛里斯接應隊友回傳，突然施展腳法推過面前嘅瑞典前鋒，走出禁區再地波解圍。好衰唔衰，個波直飛去中場線，就畀瑞典前鋒托禾倫第一時間熨射空門入咗。法國由領先到被反勝2比1，擁躉肯定睇到眼光爆，熱門客真係多得佢唔少，至於瑞典贏波功臣托禾倫賽後受訪，直到開心到喊添！

基奧特17場入17球

其實今場波法國個開得唔錯，基奧特喺37分鐘禁區左路射入個世界波，呢球係佢過去17次代表法國上陣射入嘅第17球。不過瑞典喺6分鐘後就由杜馬斯禁區內左腳勁射追和1比1。法國換邊後都有唔少埋門機會，可惜係基沙文今場冇帶射門鞋，後備登場嘅基利安麥巴比又冇貨交，結果搞到補時階段出埋事囉！

法國跌落A組次席

法國今場作客輸1比2，賽後佢哋喺A組就同瑞典同係6戰得13分，瑞典就以較佳得失球排榜首。由於只得小組首名係可以直接出線決賽周，次名最多都只係有機會踢到附加賽，再爭世界盃入場券。呢鋪法國騎呢輸波，後果可以好嚴重呀！