總結：球證「恥辱夜」格鬥大會超激
20170610
東網電視
更多新聞短片
騎士喺NBA總決賽主場以137:116大破勇士，場數追成1:3，粉碎勇士以季後賽16戰全勝姿態捧盃嘅美夢，不過騎士破蛋背後，唔少傳媒覺得，好大原因係聯盟吩咐球證「做嘢」，避免總決賽冇癮結束，結果球證亂吹搞到雙方球員躁晒上演格鬥大會。
由於騎士連輸3場冇退路，結果第1節攻入49分、半場後攻入86分，連環打破總決賽單節同半場得分紀錄，勒邦占士全場有31分、10個籃板同11次助攻，取代米高佐敦位列總決賽得分榜第3位，再以9次3雙超越魔術手莊遜進佔總決賽歷史第1位，加上季後賽罰球命中數目登上史上第1位，總算挽回些少面子。
相反，雖然杜蘭特有35分、4個籃板同4次助攻，阻止勇士以更大比數落敗，可惜史堤芬居里得14分、5個籃板同10次助攻、奇利湯臣得13分、3個籃板同2次助攻，同時失準連累勇士輸波，而且佢哋喺比賽中被主場球迷狂寸，現場不斷有人嗌「7場奪冠」，鼓勵騎士重演上年逆轉歷史，連追4場攞總冠軍。
只不過，傳媒覺得勇士某程度係被球證吹死，因為奇利湯臣上半場已經3犯，影響佢對艾榮嘅防守，而且史堤芬居里同杜蘭特同樣孭住兩犯返更衣室。最過份係，積蒙格連喺下半場投訴被判技術犯規，球證竟然想以兩個T趕佢出場，但實情係，上半場被吹罰技犯嘅係勇士教練卡爾，睇得出球證真係亂晒龍。
另外，比賽中出現超多肉搏場面，杜蘭特喺第3節上籃，曾經被路夫打完手再兜頭摑，搞到佢嬲埋勒邦占士對鬧。隨後柏祖利亞碌喺地同舒伯特爭波，又趁亂出手打人下體鬥冇品，到比賽尾段連占士都殺到眼紅，試過喺搶波時撞到隊友JR史密夫撻落地，好似玩緊格鬥大會咁，相信Game5實有好戲睇。
最新賽果(左方主場)
騎士 137:116 勇士(場數1:3)
東網體育同你追實體壇每個精彩時刻！
想撐本地波？即Like我撐本地波Facebook專頁