世盃外 完場前連輸2罰球 哈神補時救英軍
20170611
東網電視
更多新聞短片
哈神補時入波扳平。（Getty Images）
即睇賽事入波：http://bit.ly/2sfW30C
世盃外歐洲區外圍賽英倫打吡好睇過戲，英格蘭雖有後備阿歷士張伯倫建功，但蘇格蘭前鋒利治格菲斯球迷奇遇記，於87分鐘開始大爆發，3分鐘內兩度主射罰球得手反先，三獅靠哈利卡尼於補時階段入波，雙方最後打成2:2平手，堅精彩！
三獅今仗好齊腳，隊長哈利卡尼打單箭頭，拉爾拉拿、拉舒福特、迪利阿里從後支援，後防又有哈利卡希爾、基斯史摩寧壓陣，但面對鬥志高昂、大打密集足球嘅主隊，三獅進攻顯得綁手綁腳，28分鐘先出現黃金入球機會，蘇格蘭門將哥頓衝出禁區搵頭解圍不遠，畀咗拉舒福特，福仔即刻巧妙一笠，但畀敵衞閂出，哈利卡尼補射一腳亦過唔到對手後防。39分鐘，拉爾拉拿於禁區左路搞搞震，起左腳勁射又過唔到哥頓，半場兩隊窿對窿。
換邊後英格蘭有個絕佳入波機會，積基李華摩亞於右路殺入禁區，起腳一射本身離行離列，但就省中人飛向龍門，最後彈柱而出。蘇格蘭於71分鐘終於失守，後備入替嘅阿歷士張伯倫，於右路扭過一個敵衞殺入禁區後起腳射近柱，門將哥頓撲到個波都入，為英格蘭打開紀錄。
以為三獅兵團就咁小勝，但原來好戲在後頭，些路迪前鋒利治格菲斯，於禁區頂起左腳主射罰球，彎過人牆於赫特左手邊入網，先追成1:1；2分鐘英格蘭於離門約25碼又輸個罰球，利治格菲斯一不離二，今次射赫特右手面入網，完場前反先2:1。但英格蘭命不該絕，哈利卡尼主射罰球被門將撲出，但主隊解圍得唔遠，客軍於左路出波，哈利卡尼及時趕到抽入，成功追成2:2完場，於F組6戰4勝2和，繼續排於榜首。
英軍入波後被掟威士忌樽，幾乎搞出人命：http://bit.ly/2t7gM3d
東網體育同你追實體壇每個精彩時刻！