【勇士封王】杜蘭特首奪冠軍攞埋MVP

東網電視

勇士喺NBA總決賽主場以129:120擊敗騎士，場數4:1解決對手，杜蘭特全場攻入39分，背負反骨罪名離開雷霆，終於取得人生首隻總冠軍指環，兼且全票當選決賽的最有價值球員(FMVP)，雙喜臨門！

雖然騎士喺首節領先4分，不過勇士喺第2節進入瘋狂3分模式，全隊單節射入5個3分，包括杜蘭特同史堤芬居里分別射入超高難度3分遠射，帶領球隊反超11分返更衣室。騎士喺第3節冇放棄一度追近比數，不過勇士保持進攻火力以5分繼續領前。

到第4節，勇士依然控制大局，結果史堤芬居里有34分、6個籃板同10次助攻，杜蘭特有39分、7個籃板同5次助攻，協助勇士繼2015年後再次登上總冠軍寶座。另一方面，勒邦占士有41分、13個籃板同8次助攻，艾榮有26分、2個籃板同6次助攻，可惜騎士始終輸波。

另外，賽後勒邦占士專登搵杜蘭特擁抱，拋開Game4扯火對鬧嘅恩怨，哀心祝賀對方，證明KD喺總決賽嘅場均30＋得分表現，得到大帝認同。

東網體育同你追實體壇每個精彩時刻！　

想撐本地波？即Like我撐本地波Facebook專頁

on.cc東網