理大校慶籃球邀請賽　哈薩克大學奪季軍

「理大 • 科勁集團亞洲大學生籃球邀請賽」周六於麥花臣室內場上演決賽日兩場大戰！頭場季軍戰由新加坡南洋理工大學火拼法拉比哈薩克國立大學，哈薩克大學「巨人陣」籃底「屈晒機」，開賽初段就打出一波10比0攻勢。「雙塔」之一路士拿首節已頻頻強爆Paint area攞分，他上籃時伸脷的小動作十分搞笑，更有一球三分波進賬，個人首節已獨得15分，帶領哈薩克大學半場領先60比29。一行約十多名於理工大學就讀的哈薩克學生及教師，今仗亦齊齊撐場，南洋理工下半場雖然想依靠外投追分，但始終擋不住路士拿不停重施故技，最終在他攻入全場最高的27分下，哈薩克大學以97比53擊敗對手，成為今次賽事的季軍！