【超勵志】新華Dee登場 工廠佬踏出球星路

20170621
東網電視
更多新聞短片
丹尼紐頓正式成為職業球員。
即睇「新華Dee」丹尼紐頓今季精彩入球片段:http://bit.ly/2sNI8hL 
嘩嘩嘩,占美華迪後繼有人喇!呢位效力李斯特城嘅英格蘭國腳,2012年仲係一邊喺工廠打工,然後一邊踢緊地區業餘聯賽,然後憑住佢嘅驚人實力同毅力,4年間就由被李斯特城睇中,到同球會攜手打上英超,然後入選英格蘭國家隊,到贏埋英超冠軍。近日,由「華Dee」使咗成10萬鎊,喺2015年成立嘅V9學院,就終於發掘同培訓到首個成功學員!效力地區聯賽球隊嘅26歲前鋒丹尼紐頓,終於獲得英冠球會史提芬納治同佢簽職業球員合約,從此佢就可以同「華Dee」一樣,唔使再做工廠工人,踏上佢嘅球員之路,真係超勵志感人呀!
由工廠工人變身職業球員,仲要做埋英超冠軍,除咗「華Dee」之外,真係想搵多個都冇,不過想當年踢過地區球隊費列活特嘅「華Dee」就深信,喺業餘聯賽之中,其實仲有好多同佢當年一樣嘅臥虎藏龍,仲等緊其他人畀機會實現球員夢。「華Dee」喺2015年11月成立V9學院,依家每年都會為一啲有潛質嘅業餘球員,安排佢哋參加一個為期一星期嘅訓練營,等佢哋接受專業訓練,然後再安排一場示範賽,邀請職業球探到臨揀卒,結果今年佢哋安排喺曼城足球學校搞嘅示範賽,就邀請到包括曼聯、車路士同阿仙奴在內嘅60位球探嚟支持,最終除咗丹尼紐頓已經收到史提芬納治開出嘅職業球員合約,其餘仲有5位成員都獲得邀請去參與職業球隊嘅季前訓練,話唔定仲有其他人最後都可以實現球員夢添!
講番呢個丹尼紐頓,佢同「華Dee」一樣本來都係工廠工人,同樣又係打前鋒位置,今季喺地區聯賽仲轟入29球,所以依家丹尼紐頓有班落,「華Dee」係真心高興,仲大讚丹尼紐頓有佢影子添!加油呀丹尼紐頓,大家都等緊你做「新華Dee」,創造多個球壇童話呀!
東網體育同你追實體壇每個精彩時刻!