大件事！星球馬「巴基之星」獨贏1.2倍收慢包尾！

今日沙田馬場第三場國際三級賽精英碟，又再出現「佳龍駒」陣上拉停嘅翻版事件！有星球馬美譽嘅東廐馬「巴基之星」，呢場本來係獨贏1.2倍一面倒的大熱門，賽事勝望可想而知，但呢匹四歲馬起步慢閘後，鞍上人莫雷拉又推又騎「巴基之星」都無反應，更開始收慢，最終只能踱步包尾過終點！結果呢場五駒上陣賽事，開出「馬上發財」搭「醒目名駒」39倍連贏。

值得一提，今季香港打吡大賽冠軍兼四歲三冠王「佳龍駒」，上月初出戰冠軍一哩賽亦是由莫雷拉主轡，起步後亦突然收慢，最終驗出盆骨骨折搶救無效，而今次則輪到同屆打吡輸畀「佳龍駒」嘅亞軍「巴基之星」出事！

賽事之後，首席受薪董事祁禮謙亦有講兩句，他亦指出莫雷拉並非因爲懷疑匹馬有毛病先拉停，而係匹馬不願展步，而雷神為了匹馬將來，唔好學到半途而廢習慣，所以繼續策騎馬匹過終點。而「巴基之星」今場以踱步方式完成賽事，雖然是包尾第五名，但仍有十萬零五千元獎金收番。

鼎爺都有嘢講

「巴基之星」唔願跑事件全城矚目，曾參加多個國際性馬術賽事，並奪得多個獎項嘅李家鼎當然有關注事件。

依家擔任馬術指導工作嘅李家鼎解釋，「巴基之星」可能情緒唔好或者厭戰，亦可能覺得自己出閘唔順，突然唔想追趕對手，呢啲係忽然冇咗鬥心嘅表現。其實喺馬術領域經常出現呢類情況，例如馬匹跳咗幾個欄之後忽然冇咗鬥心，覺得唔過癮，之後就停喺度，即使踢佢鞭佢都不動如山。

至於莫雷拉拉停馬匹之後，為咗「巴基之星」唔好習慣半途而廢，所以繼續鞭騎，希望佢展步。李家鼎大讚雷神嘅做法正確，正所謂學壞三分鐘、學好三年功，一定要教識「巴基之星」競賽為何物。

對於「巴基之星」建議，李家鼎話馬季就快抖暑，應該畀「巴基之星」放草，忘記唔好嘅事，咁樣對佢將來嘅競賽生涯有幫助。