源自「溜冰裙」的堅持

「亞洲公開花樣滑冰錦標賽」今年8月2日至5日，假九龍灣Mega Ice盛大舉行。跟大部分運動員一樣，現年21歲的戚紫瑩當日參與花樣滑冰，都是因為一份「堅持」。「最初係因為睇見人哋嘅溜冰裙喺冰場上飄吓飄吓，好靚。家人問我想唔想試吓學，就係咁開始咗喇。」戚紫瑩笑說。

目前在Mega Ice擔任教練的戚紫瑩，與大家分享其源自「溜冰裙」的堅持，她謂：「其實喺場上嘅每一個動作，背後都反覆練習成千上萬次，每一次跌倒都要企番起身再嚟過。」

談及當下目標，樣子甜美的戚紫瑩表示，希望可以繼續開開心心去溜冰，學業和溜冰可以同時兼顧。「溜冰對我嚟講，以前只係一條好靚嘅溜冰裙，依家已經係我嘅生活習慣，因為冇咗溜冰嘅話，我嘅生活應該會唔同晒。」