社區盾 門將宴客無端打少個 車仔騎呢失盃

20170806
東網電視
更多新聞短片
即上墨超刨績王:http://win.on.cc/ligamx 
「球壇聖殿」溫布萊球場,香港時間周日(8月6日)爆發嘅英格蘭社區盾,上季聯賽盟主車路士火併足總盃冠軍阿仙奴鬥殘陣,完場前10分鐘好睇過戲,車仔先有柏度洛迪古斯被趕出場,阿仙奴憑新兵哥拉辛拿斯後備入替建奇功,法定時間逼和1比1即射12碼決勝,車仔無啦啦搵門將泰拔高圖爾斯主射,佢亦不出意料地射失,最終兵工廠憑互射12碼以4比1勇挫車仔,亦係老帥雲格入「廠」後第7度捧走社區盾,果然係專家。
雙方5月尾先喺足總盃決賽交鋒,當時阿仙奴同樣喺溫布萊球場爆冷贏車路士2比1封王,今仗重臨舊地,大家都鬥殘陣,車仔除咗有王牌夏薩特養緊傷外,盛傳會離隊嘅箭頭迪亞高哥斯達亦冇份,而新兵艾華路莫拉達只先列後備,前線由柏度洛迪古斯、韋利安支援巴舒亞伊,勢估唔到阿仙奴主帥雲格仲禮讓,阿歷斯山齊士及奧斯爾連後備都冇,只派出新兵拿卡錫迪擔正。賽前兩軍都為6月中倫敦大火慘劇默哀,一開波阿仙奴係威係勢,其中拿卡錫迪於禁區邊妙射中柱彈出堅慘,可惜隊長梅迪薩卡同加利卡希爾爭頂時撞到爆晒缸,由新加盟嘅哥拉辛拿斯入替佢,被車仔搶回主動。
易邊後僅1分鐘,車仔隊長加利卡希爾頭槌二傳,入楔嘅域陀摩西斯快射先開紀錄。不過去到80分鐘,柏度洛迪古斯從後剷跌艾利尼,直接領紅被趕離場,即令形勢逆轉,2分鐘後格列沙加罰球斬畀哥拉辛拿斯頂成1比1,亦係佢入「廠」後首個士哥。法定時間各一言和,即採取新制「ABBA」互射12碼,結果車仔先後有泰拔高圖爾斯及艾華路莫拉達宴客,阿仙奴最終互射12碼贏4比1捧走今屆社區盾。
即到彩報星club熱身賽專頁:
東網體育同你追實體壇每個精彩時刻!