港超聯 得番10個!和富大埔被夢想FC逼和
新一季港超聯今周「開鑼」,季前積極招兵買馬的和富大埔首戰作客青衣運動場,迎戰新組軍的夢想FC。和富大埔上半場憑艾華度頭鎚建功領先,惜下半場翟廷峯被逐成為轉捩點,打少一人下被夢想FC以1比1逼和。
上半場以大埔攻勢較為凌厲,25分鐘,艾華度接應角球頂入,為和富大埔先開紀錄。5分鐘後,伊高沙杜尼右路快放,擺脫對方守衛後壓落底線傳中,可惜被謝家榮接實。但這位新外援在上半場補時階段被黃志聰鏟傷退下火線,需要擔架抬離場。最終和富大埔以1比0領先上半場。
下半場夢想FC奪回攻勢,52分鐘,拿祖中場突破大埔防線傳給李嘉進,李嘉進扭過門將後傳中,可惜禁區無人接應。62分鐘,翟廷峯阻撓對手快開界外球,兩黃一紅被逐,令大埔要以十人應戰。3分鐘後,迪亞高半場接應長傳,單人匹馬殺入禁區傳給謝家強,可惜謝家強撞射「撻Q」未能把握。到81分鐘,拿祖禁區頂放冷箭中柱,伏兵門前的雷斯輕鬆「執雞」為夢想扳平。最終打少一人的和富大埔被夢想FC以1比1逼和。
賽後夢想FC主帥梁志榮盛讚球隊一班小將的發揮:「今屆港超只有我哋係由唔同隊嘅年青球員組成,第一場得到呢個成績令教練團非常滿意,亦都超出咗我哋預期,當然如果贏埋就會更加好!我哋放膽比機會一班後生仔用波,對香港足球亦都絕對有幫助。」
而大埔教練李志堅就炮轟球證執法:「伊高沙杜尼受傷而家入咗醫院,佢比人從後踢跌連黃牌都冇,球證冇比牌制止呢個犯規,控制唔到場面,容許再犯第二次規係一個問題。翟廷峯嗰球界外球就更加無辜,對方用打籃球嘅方式踎低開界外球好唔合理,球證應該正視呢個問題。」
東網體育同你追實體壇每個精彩時刻!