【港超專版】由成龍講起：保連奴十年奮鬥史

人生有幾多個十年？祖籍巴西的保連奴自2008年首次踏足香港，到現在已近十年。這位由最初對香港的認知只有「Jackie Chan（成龍）」的老外，到入籍做香港人；由在傑志成名獲「北上」機會，到因傷「坐多過踢」毅然回流……十年即將過去，又似回到起點，但對34歲的保連奴來說，這中間的難處，都可憑心中「那團火」去克服，決心再為傑志衝擊錦標！圖/文：何彥霆（部分相片由受訪者提供）

回想2008年1月，年僅25歲的保連奴在上機前，對香港這個地方的認知幾乎是零︰「我嘅夢想係去巴西以外嘅地方落班，不過目的地係香港就從來冇諗過。其實當時我對香港同呢度嘅球會係一無所知，淨係知道呢度有個Jackie Chan！」

語言不通難過爭正選

初到香江，保連奴即在公民爭取到一席正選，靠的就是「那團火」︰「我嚟到香港第一個目標就係要令球會同我續約，因為當時我嘅合約只有5個月，所以我要盡最大努力去爭取、去搏命。喺5個月後，公民就贏得足總盃，而我亦得到一份2年嘅合約。」

離鄉別井從來不易，但一向堅強自信的保連奴就覺得這點「其實唔難」，真正的問題卻在球場以外︰「其實我喺巴西嘅時候，已經唔喺自己原本嘅城市踢波，所以離家生活唔係太困難。反而最大嘅挑戰係語言，因為喺巴西係講萄葡牙文，嚟到香港要我用完全唔識嘅廣東話同英文嚟溝通。不過過咗幾個月之後，都會開始主動同人打招呼，跟住情況變得愈嚟愈好。」除了足球，保連奴在香港更邂逅同為「異鄉人」的英國籍妻子，令他決定留在香港落地生根︰「我同太太認識咗有5年，而佢亦喺呢度居住超過10年，我哋依家計劃留喺香港組織家庭。」

目標「1個月內踢足90分鐘」

去季保連奴獲中甲球隊佳兆業垂青，成功「北上」發展，惟因傷患問題上陣次數寥寥可數，最終要解約重返傑志，換着別人或會因此一蹶不振，但保連奴卻只簡單一句「可惜」來形容。回到傑志，保連奴專心做復康操練，看他一身「爆肌」，就知這位34歲球員「那團火」仍未熄滅，對於新季展望，保連奴表示︰「首要目標當然係復出，再睇吓今年打成點啦！現時都開始重拾比賽狀態，希望喺1個月內可以踢足90分鐘，協助球隊爭標！」

未雨綢繆考定教練牌

對於傑志新一季的展望，保連奴就充滿信心，指球隊能以「不變應萬變」︰「改動不多係傑志嘅優勢，球員同教練都好清楚球隊嘅打法，我哋亦專注為奪標而戰，其他球隊要擔心我哋嘅實力，而唔係我哋去為對手而憂心。」

足球員職業生涯甚短，保連奴經歷過嚴重傷患後，更明白箇中道理，開始未雨綢繆︰「我仲未完全知道掛靴後想做啲乜嘢，應該都係同足球有關嘅工作，但我都嘗試踏出咗第一步，去考取教練牌，咁到時真係想教波都已經建立咗一定嘅基礎。」

內地生活有「另類」得着

保連奴在2015年年尾入籍後成為本地洋將，適逢中超、中甲聯賽由2016年起取消港澳台球員為「內援」的規定，最終能趕及上「尾班車」轉投中甲深圳佳兆業。原以為保連奴可以從此提升到另一個層次，惟持續的膝部傷患令他的上陣機會銳減。雖然在球場上「食白果」，但保連奴在內地一樣有收穫，就是學懂寫自己的中文名字——福保羅。

保連奴表示︰「原本喺中國踢波最大嘅挑戰，就係爭取正選上陣，可惜因為傷患唔容許到我做呢樣嘢。我明白作為足球員，無論去到邊都有機會受傷，但喺呢段期間，可以見識到內地球隊嘅訓練方式同強度，都算有得着。」

保連奴還笑言，在內地生活時，當地銀行經常要求他寫中文簽名，久而久之，令這位「老外」能正正經經寫出自己的中文名呢！