港澳埠際賽　前港青林毅東披澳門戰衣

現為澳門足球代表林毅東曾代表香港U15、2013年入選過香港東亞運代表隊初選名單，亦征戰過香港職業聯賽。最近「阿東」在機緣巧合下獲澳門徵召，會於港澳埠際賽披甲上陣。為出席澳門隊練習不時要港澳兩邊走，「阿東」表示：「感受緊『嘉恆』（梁嘉恆）嗰陣讀大學來回香港澳門嘅滋味。」

近年因工作關係轉戰港甲的林毅東曾跟拜現任和富大埔主帥李志堅門下，效力過深水埗，亦曾為和富大埔上陣。「阿東」指披上澳門球衣屬機緣巧合，四年前始獲邀到澳門踢小型球，開始認識澳門足球，加上在效力和富大埔期間認識來自澳門的香港飛馬前鋒梁嘉恆，當時更向「嘉恆」笑說：「不如澳門隊搵我嚟踢吓啦！」其後「嘉恆」詢問當時澳門主教練譚又新會否徵召「阿東」，惟當時同一位置已有陳敏，故未有向「阿東」提出邀請。直到今年暑假，正職為體育教師的「阿東」跟隨梁嘉恆到澳門跟操，繼而獲澳門代表隊徵召。

媽媽是澳門人的「阿東」在澳門出生直至1993年移居香港，然後一直在香港長大。「阿東」坦言作出這決定很難，皆因對自己身分模糊：「我始終唔係喺澳門長大，讀書喺香港，做嘢喺香港，突然間代表澳門。但係又唔可以講同澳門無關係，我每一年都會返去澳門同親戚玩，又會留喺嗰度住。」選擇代表澳門，「阿東」感恩有家人支持：「佢地無反對，衡量好自己啲時間，如果想都可以去試。」為兼顧工作，有時出席操練更要即日來回港澳，但「阿東」認為值得：「我自己覺得要去試一樣嘢就一定要犧牲。」

在澳門足球代表隊才第一次合作的主教練陳曉明指：「林毅東雖然技術並不細膩，但勝在夠『爛打』，充滿球味，每次操練、比賽都相當投入，認真對待，係教練心目中可靠嘅球員。」陳曉明讚揚「阿東」的態度：「由於佢唔喺澳門定居，每次練習都自發即日來回香港同澳門，表現出對球員身分嘅尊重。雖然佢唔係必然正選，但依然保持專業態度，有一份感染力，為其他隊員帶嚟正面影響。」

至於港澳埠際賽，「阿東」明言面對舊隊友不會留力：「力一定冇得留，睇吓自己可以去到邊，希望大家都唔好留手。」與舊隊友對陣，「阿東」希望能打破港隊壟斷：「港澳埠際賽澳門輸咗咁多年，我希望唔係年年都一定要輸，有一年，可能係今年就可以贏！」