【港超專版】艾華頓：情與義，值千金！

「別人笑我太瘋癲，我笑他人看不穿」由前季來港加盟灝天黃大仙開始，艾華頓就被定形為「悲情人物」，「捱平人工」、「兼職幫補」、「劏房屈蛇」等字句，幾乎都會在其專訪或報道中出現，但原來「主人翁」艾華頓從不覺得自己來港後有多慘、有多苦。「原來大家對我有咁嘅印象，其實我從來都唔覺得自己慘，而且仲覺得好快樂添！因為嚟香港令我得到兩樣好珍貴嘅嘢，就係做職業球員嘅機會，同埋識到一位好朋友。」新一季加盟陽光元朗的艾華頓，一臉滿足地道。　　

雖然因為「帕卡」襲港，令到陽光元朗成為了4支尚未登場的港超聯球隊之一，但隨着在季前熱身賽表現搶鏡，艾華頓未正式出場，已獲球迷視為該支地區球隊今夏的最佳收購。「好高興球迷咁歡迎我，我亦對能夠加盟元朗感到非常興奮!之前嘅兩個球季，我曾經同元朗交過手，亦作客過元朗大球場，畀我嘅印象好深刻，係一支好似大家庭嘅球隊，當時我就同自己講，如果有一日轉會，可以成為呢支『橙軍』嘅一分子都唔錯呀？」英文依然屬「有限公司」的艾華頓，透過「義務翻譯」法比奧表示。

未談及新季展望，先與艾華頓「回帶」談談他在許多人眼中的「淒慘歲月」。「可能好多人認為我頭兩季喺香港落班好慘，但我真係一啲都唔覺得。反而我好感恩，因為嚟香港之前，我連一次做職業球員嘅機會都冇。冇錯頭半季因為一啲原因，我只能夠跟操而冇法上陣，係有少少失落，但問題好快已經解決咗，我好享受可以喺灝天黃大仙，展開我嘅職業球員生涯。」回想往事，艾華頓不禁流露出甜笑。

據消息透露，為灝天黃大仙上陣半季後，最少三間港超球會卻打艾華頓的主意，但最終艾華頓都一一婉拒，原因只為情與義，他說：「原來你都知道，係呀！有幾間球會喺嗰季之後，都話想我加盟佢哋，且都開出令我好振奮嘅條件，但因為喺球季完結之前，我已經同我嘅教練招重文達成咗協議，佢應承會盡大努力同我繼續合作，所以我一直等佢嘅回覆，結果我哋一齊喺標準灝天度過咗一個球季。」艾華頓謂由來港一刻，已視招重文為其「伯樂」，因為沒有他，艾華頓的名字未必會出現在港超聯中：「『文仔』一直好為我着想，好關心我，為我爭取最好嘅條件，係一位無論做教練定朋友都好值得信任嘅人，冇佢冇我！」

新一季，艾華頓將會披起陽光元朗的戰衣，亦是他來港後首次與「文仔」分道揚鑣，可有為此擔心？「唔會啦！加盟元朗前，我哋傾過好多次，佢畀咗好多意見我，我會喺度努力爭取表現答謝『文仔』，唔想亦唔會令我呢位好教練、好朋友失望。」每次提及「文仔」，艾華頓總會露出招牌笑容。

雙腳紋身：左囝囝右老婆

跟許多來自巴西的外援一樣，艾華頓的家庭觀念非常之重，平日與妻兒形影不離還不夠，還要將兩位「寶貝」的名字紋在雙腿上，十分癡纏。

加盟陽光元朗後獲安排入住村屋，艾華頓閒時總愛與妻兒在家中觀看電影，或兩夫妻「煮飯仔」，過着大部分人都嚮往的「簡簡單單」家庭生活。「妻子為支持我追尋足球嘅夢想，犧牲咗好多，而囝囝就係我奮鬥嘅動力，我好希望可以為佢哋帶嚟開心快樂嘅生活，呢個亦係我嘅心願。」不時在facebook上載家庭照的艾華笑說。

雙腿對足球員而言有多重要，相信不用再花筆墨去形容，艾華頓將愛妻和囝囝的名字Marieli和Bernardo，分別紋在右和左小腿上，十分搶眼，他謂：「佢兩個係我嘅生命，好感謝上主嘅安排。」