【港超專版】介紹番!「真‧好人」列文

20170908
東網電視
更多新聞短片
「能力愈大,責任愈大」除了形容蜘蛛俠之外,相信在列文身上都同樣適用,這位曾效力英格蘭多間球會,並於今夏轉投冠忠南區的中堅,不但有自己一套足球理念,同時亦不忘回饋社會。希望踢到40歲的他為自己孩子樹立榜樣,並決心宣揚「好波兼好品」精神!
前英甲兵為足球理念返港
自2010年轉投泰超球會蒙通聯後,列文曾先後效力傑志及馬超球會彭亨,在亞洲度過了6個年頭,今年2月竟突然轉投英甲的基寧咸,並協助球隊護級。雖然列文在約滿後收到英格蘭以及世界各地球會邀請,但最後都選擇重返香港聯賽,今夏轉投冠忠南區,這位前巴基斯坦國家隊隊長解釋決定加盟的原因︰「球會理念好緊要,教練同球隊上下要了解自己朝乜嘢方向進發。我曾經有機會去其他國家落班,但係我認為轉投南區剛好時機成熟,球會一直進步中,並且向住下一個階段發展,我希望可以喺度見證到佢哋提升到另一個層次。」
對足球理念如此重視的列文,早於2012年設立了基金會,用行動實踐「好波不如好品」的精神,藉足球改善英國一些弱勢社群的生活︰「基金會嘅成立係畀更多機會唔同背景嘅人士,基本上幫佢哋做一啲自己引以為榮嘅事情,例如成為義工、合資格嘅教練或球證等,令佢哋重返社區,為當地嘅球會工作,成為其他人學習榜樣,所以計劃並唔係為咗培訓足球員,而係培育更多好人出嚟!」
「狀態Top Fit踢到40歲!」
列文今趟選擇重返香港,另一原因是太太對香港情有獨鍾︰「之前曾經喺度一段時間,我對香港熟悉,太太都好鍾意呢度。我個女喺香港出世,個仔就喺馬來西亞出生。我認為當你喺外國落班,就要融入當地生活,對小朋友嚟講亦係一個體驗唔同文化嘅機會,可以擴闊孩子嘅視野。」
雖然33歲對不少足球員來說,已經是接近掛靴之齡,但列文並不認同,更為自己定下一個目標︰「我感覺良好,仍然喺頂尖狀態。我職業生涯踢超過400場比賽,我認為自己可以喺香港踢多6至7年,我想踢到40歲!其實只需要好好照顧自己,並且有球會信任你就可以。我見元朗嘅法比奧都踢到40歲,迪天奴到38、39歲都仲踢,高尼路都踢到好遲先掛靴。」
熟悉貝利領隊 「戴偉浚將會更強!」
作為首位在英超上陣,並踢足英格蘭4個級別職業聯賽的巴基斯坦裔英籍球員,列文的背景令他順理成章擔任一些與英國少數族裔或反種族歧視組織有關的足球大使。對於今夏獲英甲球會貝利提升上一隊的港將戴偉浚,列文表示自己有留意他的動向,並給予他一些意見︰「我叫佢享受呢個體驗,並嘗試從領隊(李爾奇勒)身上學習,我同李爾奇勒好熟(效力富咸時的隊友),佢會令戴偉浚喺心理上更加強悍,體力化嘅聯賽亦能令佢改進,戴偉浚嘅技術毋庸置疑,踢歐洲或英格蘭聯賽有助佢思維發展,成長得更快。假若佢將來代表香港隊上陣,並且返回亞洲落班,佢喺英格蘭嘅經驗將會成為佢嘅優勢。」