英超　3場不敗！阿記賣走黑腳唔同啲

即上英超刨績王：http://win.on.cc/epl

英超周日頭場上演倫敦打吡，阿仙奴以眾凌寡之下，作客賽和車路士0比0，唔單止結束近5次聯賽作客車仔輸晒嘅噩夢，自放走「黑腳」阿歷士張伯倫後，聯賽連盃賽近3仗未輸過，更將黑氣過埋畀「張仔」新東家利物浦，之前畀人鬧爆賣走「張仔」嘅主帥雲格又贏1場。

賽前聯賽連歐聯4連勝嘅車仔，雖然好番冇耐嘅王牌夏薩特先任後備，但有弗到爆嘅射手艾華路莫拉達擔正，隊長加利卡希爾亦刑滿復出，相反近5次聯賽造訪史丹福橋球場輸晒嘅阿仙奴，唔單止有中場核心奧斯爾因傷連後備都冇份，主帥雲格竟然用伊禾比，代替日前歐霸贏科隆入靚波嘅王牌阿歷斯山齊士打正選。不過車仔除咗初段柏度洛迪古斯單刀被救出外，之後畀阿仙奴控制戰局，其中完半場前艾朗藍斯殺入禁區篤射中柱，拿卡錫迪即近門執雞炒高最具威脅。

易邊後戰情處於膠着，中段雙方齊齊換入夏薩特及阿歷斯山齊士加強攻力，75分鐘梅斯達菲接應罰球頂入，可惜隊友越位在先搞到食咗鋪詐胡，完場前車仔中堅大衞雷斯鞋底行先踩中哥拉辛拿斯，做埋「紅牌阿姑」被逐，最終雙方打成0比0，阿仙奴亦結束近5次造訪史丹福橋輸晒嘅噩夢。值得一提係，阿仙奴自今夏轉會窗關閉前放走「黑腳」阿歷士張伯倫去利物浦後，連歐霸在內近3仗錄得2勝1和未輸過，反而獲得張仔來投嘅利物浦，近3仗未贏過，包括慘吞曼城5蛋，畀球迷鬧爆賣走「張仔」嘅主帥雲格又贏1場。

東網體育同你追實體壇每個精彩時刻！