英超　古仔世界波！紅軍返勝軌險過剃頭

即上英超刨績王：http://win.on.cc/epl　

周六深夜英超尾場，利物浦戲劇性險勝李斯特城，終於結束4場不勝困局。今仗紅軍精銳盡出，靠菲臘比古天奴1入球1助攻領先2粒，但後防不穩問題持續，雖然有神軒入波，但岡崎慎司同占美華迪先後士哥，跟手紅軍門將米洛列特又派膠侵犯華Dee輸12碼，但華Dee親自主射竟然畀米仔救到，最終紅軍食晒救心下，終於重返勝軌。

紅軍剛於英聯盃被李斯特城踢出局，今仗一開波就瘋狂進攻，安利簡恩遠射中柱先聲奪人。16分鐘紅軍古天奴左路用右腳斬去遠柱，穆罕默德沙拿超窄角度頂入，紅軍先開紀錄。之後古天奴於禁區頂射入世界級罰球，客軍領先2粒。以為可以輕鬆贏番場，點知完半場前又輸死球，岡崎慎司門前先拉住米洛列特，球證睇唔到冇吹罰，最終呢名日本國腳求仁得仁，門前篤入追番粒，半場紅軍僅領先2:1。

換邊後李斯特城搶番主動權，不斷猛轟紅軍後防，紅軍領隊高普換入史杜列治，呢名前鋒極具級數，68分鐘紅軍打反擊，史獨冷靜交畀佐敦軒達臣，後者扣入中路射成3:1。利迷以為有好日子過呀？太天真喇，轉個頭華Dee於門前頭槌執雞頂成2:3掀起高潮。

李城之後利用簡單長傳，已搞到紅軍後防風聲鶴唳，最終一次反擊，華Dee入楔禁區，米洛列特衝出一腳踢中華Dee，球證直指12碼點，佢操刀大腳一抽，卻被米仔救出。之後李城一次右路出波，明顯省中安利簡恩隻手，不過球證冇畀12碼，最終紅軍力保3:2勝果，於9月終於贏波。

東網體育同你追實體壇每個精彩時刻！

http://bit.ly/2ecTF2A