【港超專版】「唐文」大談湊B經

再難纏的對手，傑志後衞唐建文於場上都有力一一化解，不過這位32歲的爸爸回到家中，面對兩位子女的「前後夾擊」卻被考起。當中3歲半的兒子「信信」已開始懂性，一舉一動尤其令「唐文」苦惱，但經過長年累月的「訓練」，「唐文」亦已領略出心得，湊仔其實唔難！

唐建文與太太育有一子一女，外表看似是慈父的他原來對囝囝相當嚴格，更甘願在家中「做醜人」：「之前個個都話我會係慈父，但依家我有好多規矩，如果佢哋食飯唔坐定，或者冇禮貌，我都會執得較嚴，因為我有責任去幫小朋友諗後果。」即使管教嚴厲，但「唐文」表示「去到草地就冇規則」，任由囝囝周圍跑，他亦從不大聲呼喝，用獨特技巧解決囝囝扭計的煩惱：「佢唔肯做就唔理佢，我只會不斷重複要佢做嘅嘢，當佢發覺自己唔能夠得逞，就會變得好平靜，唔會成日亂嗌。」

瞓前講古仔增加話題

講到與仔女增進感情，經常出外練習及比賽的「唐文」，自然比當全職家庭主婦的老婆「輸蝕」，他惟有想辦法多與囝囝相處，並透露加強父子互動的秘訣：「瞓覺前講古仔我覺得係必須，因為佢會主動發問，有機會擴展話題，所以依家就算我幾眼瞓，都會同佢講晒兩本故事書先瞓。」「唐文」亦笑言家中電視只是裝飾，會與囝囝「搵嘢玩」解悶，珍惜相處時光：「同佢一齊學新嘢係最開心，例如英文字母同砌積木，見到佢喺過程中好享受，我已經覺得好滿足。」

「想佢大個記得爸爸係球員」

對於囝囝的將來，「唐文」沒有期望他要成為足球員，或在學業上取得成就，但有句話想與長大後的囝囝說：「我好鍾意佢嚟睇我踢波，我依家喺傑志競爭好大，佢哋係我進步嘅動力。我想繼續出場，延續佢嘅記憶，等佢長大後記得爸爸係足球員，話畀佢聽爸爸都有努力過，所有嘢都係要付出，付出未必有回報，不過唔付出就一定冇。」「唐文」為囝囝犧牲私人時間，多盒模型只好長存假天花內，他一邊笑指「最好佢快啲大，唔好阻住我」，轉頭又謂「惟有等佢大個一齊砌」，或者，這就是每名父親都有的矛盾。

「性格小子」冧爆老竇

「唐文」兒子「信信」年紀輕輕，不過已相當有性格，講起這位「性格巨星」的趣事，「唐文」更加哭笑不得：「佢第一日返幼稚園，講完Bye Bye就行入課室，完全冇唔捨得我；嚟球場睇我踢波就全程黑面，但又坐足睇晒90分鐘，完場問佢想唔想一齊影相，佢又唔講嘢，不過臨瞓前佢就講番感受，我做過咩佢都記得，真係好搞笑。」

受訪當日「信信」在大坑東遊樂場玩得樂此不疲，一個足球已令他跑不停，精力充沛讓爸爸都有投訴：「唔知點解佢唔係好鍾意瞓覺，6點幾起身都可以玩到夜晚10點，我未見過佢自己行上床瞓覺。」最後「信信」難得開金口：「我以後都想嚟呢度同爸爸踢波。」相信「唐文」有多辛苦，聽見都「冧爆」啦！