【港超專版】撐愛兒踢波 胡晉銘爸爸好嘢！

香港現今不少家長為下一代的將來費盡心思，務求讓孩子得到最好的教育及際遇，但往往令一眾學生得不到童年應有的快樂回憶，年紀輕輕便要機械式地鍛煉自己。日前首次入選香港隊決選名單的香港飛馬中場胡晉銘，卻是幸運的一個，全靠父親背後不斷支持，他的足球夢才得以延續下去！　　　　　　　　　　　　　　　　　　圖/文:何彦霆

將於今年11月尾滿20歲的胡晉銘，年幼時曾經接觸過其他體育項目，但「胡爸」Jackie透露，兒子很快便對足球產生興趣︰「佢細個嗰陣，畀佢嘅教育較多元化，因初時未知其興趣，所以佢小一、二時學過體操，亦都打過乒乓球，之後，佢對足球興趣比較濃，中學時更加入南華青年軍，跟住就放較多時間喺足球方面發展。」

興趣一致 有談不完話題

身為胡晉銘最忠實球迷的「胡爸」坦言，幾乎囝囝所有賽事都有入場觀看︰「除非自己唔得閒，否則都會去睇佢比賽，包括以前青年軍、預備組甚至依家入場睇港超聯賽事，講到最難忘嘅比賽，相信係青少年足總盃U18四強對南華，去到最後一刻太陽飛馬落後一球，連龍門都衝上去，竟然畀佢入番一球，最後射12碼贏埋。決賽亦同樣難忘，由陳柏熹射入世界波奪冠，囝囝踢咗咁多年第一次贏冠軍，仲要係雙料冠軍，所以好多謝教練對佢嘅栽培！」

兩父子能夠有共同話題，關係亦因此拉近，胡晉銘與父親均承認，足球令他們之間的距離愈縮愈短，「胡爸」說︰「呢個係世界性嘅運動，相信全球嘅男性超過一半都鍾意足球，呢樣運動可以有無盡嘅話題！如果冇咗足球，我都會為佢培養其他興趣，但可能會冇咁Close！」胡晉銘表示，在足球層面，兩人幾乎無所不談︰「歐洲好多聯賽，甚至亞冠盃、亞協盃，大家都會傾一餐，我哋興趣一致，係一件好幸運嘅事。」

為令兒子一圓足球夢，「胡爸」Jackie除了入場支持外，更為愛子將每場比賽資料記錄下來：「除咗入場睇佢打波之外，喺背後都做咗好多嘢，包括記錄佢由08年開始代表過邊隊，每次比賽踢咗幾多分鐘、賽果等資料，當中有青年軍、港超聯、預備組，甚至國際賽，學界由中學開始到大專賽都有，資料十分齊全，等佢第時大個可以睇番。我仲為佢每場波評分，不過佢就唔肯為自己評分，話自己當局者迷喎！」

另類「胡爸」：專心踢好啲波先

足球員職業生涯短暫，父母認為「讀書要緊」，希望子女首先「讀好啲書」的例子屢見不鮮，但「胡爸」剛好相反︰「其實我好想同佢講，專心踢好啲波先，因為依家20歲係進步最快嘅時候，但係呢個諗法同佢有衝突，佢覺得要讀書！我相信好多家長唔會咁諗，但我覺得讀書可以遲啲先讀，去到23、24歲踢唔到上去嘅時候先去讀書，都唔係一個問題。」不過，胡晉銘都有他堅持「邊讀邊踢」的理由︰「我唔係刻意同阿爸對立，主要係想自己多一個保障，同埋捱到大學畢業，證明畀家人睇一心係可以二用嘅。」