【港超專版】杜馬思版《美女與野獸》

20171007
東網電視
更多新聞短片
對於上季尾不獲冠忠南區留用的杜馬思而言,今年暑假可謂既難熬又漫長,一方面未有球會聯絡斟介,但同時卻要操弗自己為落班做準備。在這段難捱的日子裏,杜馬思除感恩上主的引領外,還萬分感激愛妻Liliane的支持。「坦白講,我嗰段日子的確好擔心,但我好幸運有Liliane喺身邊,不斷支持同鼓勵我,我真係好感激Liliane,亦都感謝上主畀我遇到佢。」
踢法勇悍,加上惡形惡相,令自4年多前由列卡度引薦來港加盟標準流浪開始,杜馬思便與「球場怒漢」和「球場屠夫」的形象,結下不解緣。「吓!『怒漢』?『屠夫』?有冇咁誇呀?講到我咁得人驚嘅?我踢中堅呢個位置,大部分時間都要同一啲高大中鋒對抗,若果我唔係呢種踢法,我應該唔可能繼續喺港超落班喇。」杜馬思現在說得輕鬆,他坦言曾經以為自己會緣盡港超。
美女追野獸典型「人生勝利組」
「上季尾當我知道南區不會留用我後,我諗住仲有成個暑假嘅時間,所以冇急住搵班落,一心養好啲傷,操番弗先算。但點知一日復一日,去到8月都冇球會聯絡我,咁我仲操唔操好呢?冇班落點算?搵唔搵其他工?好多好多個『問號』喺我個頭上邊出現。」
人不怕困惑之時,最緊要有人支持,回想起今夏的艱辛,杜馬思十分感激太太Liliane的支持。「Liliane無時無刻都鼓勵我、開解我,唔係佢我可能早就放棄咗,係佢令我振作,令我可以渡過呢次難關。Liliane,Eu te Amo(意即:我愛你)。」咦!看來「屠夫」也是「手段哥」。
2015年1月12日,當季效力黃大仙的杜馬思與Liliane在港註冊成婚,之後兩人在儀式上的合照在網上社交平台廣泛流傳,球迷紛紛送上祝福外,出現得最多的留言就是「美女與野獸」。「哈!哈!Liliane毫無疑問係『美女』,好開心球迷同我嘅睇法一樣。用『野獸』形容我都好貼切,但應該只適用喺球場上嘅我,球場以外我都好靚仔嘅,起碼Liliane係咁諗呀!」露出了「人生勝利組」笑容的杜馬思表示。
嫌大家不夠「葡萄」?杜馬思道出與Liliane的戀愛史,字裏行間透露了令人「扯火」的一件事────「女方主動」:「我同Liliane第一次見面係喺朋友嘅派對度,當時大家都表現好怕羞,冇乜點傾偈。點知派對之後,Liliane喺facebook搵到我,再畀『交友邀請』我,我開心到飛起,之後傾偈發現大家都有一見鍾情嘅感覺,好快就約會做咗情侶喇。」這些機會……
感恩上主引領
今季前獲陽光元朗開出聘約的杜馬思,除操練和比賽外,大部分時間都與Liliane及大女Manu一起,不是到海灘曬太陽,就是在家中弄巴西燒烤。就算有在港巴西球員的聚會,杜馬思總會與Liliane雙雙出席,十分恩愛。「上主一直引領我,照料我嘅生活,香港係我第二個家,係我熱愛嘅地方,能夠同我最愛嘅人Liliane喺度生活,實在係上主嘅恩賜,我好感恩,我哋會永遠相親相愛。」「鐵漢柔情」或許老土,但有更貼切的形容嗎?
火辣現身引球迷分神
4個多球季以來,每逢杜馬思落場比賽,看台上不難發現Liliane火辣的身影,每次出現總會令球迷叔叔們分神。「有啲咁事?我冇留意喎,或我太專心睇比賽同幫杜馬思打氣。嚟緊我會留意吓,睇吓係唔係先。(介意嗎?)唔會啦!佢哋都係覺得好睇先睇啫,多謝晒喎!」偶然會為友人的廣告公司擔任模特兒的Liliane笑說。