【英超Live】後防笑話級數 紅軍輸四個一皮
20171022
東網電視
更多新聞短片
即上英超刨績王：http://win.on.cc/epl
周日晚英超雖然得兩場，不過都係好戲碼，先有愛華頓主場對阿仙奴有頭盤，跟手再有主菜熱刺喺溫布萊迎戰利物浦。愛華頓今季雷聲大、雨點小，戰績不濟令領隊朗奴高文飽受壓力，今仗再輸隨時落台，呢場唔搏更待何時。另外高調回巢嘅朗尼，亦想藉今仗證明身價，02年佢就係對住兵工廠，射入世界波一腳成名，今場亦必搏老命。
熱刺鬥紅軍當然亦值得高度注意，熱刺鋒將哈利卡尼狀態大勇，腳風勁順或再有士哥，利物浦剛於歐聯大發神威大數馬里博爾7蛋，羅拔圖法明奴同穆罕默德沙拿都托弗，今場兩軍各大射手盡騷哥利，想知踢成點，梗係要留意我哋《英超Live》啦！
【00:53】【全場完】熱刺 4:1 利物浦
紅軍大退步，輸畀熱刺四個一皮。上季對強隊表現出色嘅利物浦，今季完全冇晒呢種特質，主因係後防弱不禁風。球隊全場四個失波，全部因為後防失誤，頭12分鐘就出現誤包越位、中場漏頂，早早落後0:2。雖然其後沙拿追番一粒，但完半場前紅軍六個後衞，都頂唔住對面三個攻擊球員，半場輸1:3。換邊後米洛列特出迎打手槌又打唔晒，哈利卡尼於一眾紅軍後防之中，輕輕鬆鬆又入波，早早將場波擺入雪櫃。今仗本身應該係強強對碰，但利物浦後防簡直係笑話一則，熱刺大勝可謂非常輕鬆，紅軍一日搞唔掂後防，要入番英超前四，相信要有奇迹出現。
【00:33】
74分鐘，古天奴禁區頂又出「古一招」，但又畀洛里斯接實皮球
【00:26】
67分鐘，古天奴禁區頂左腳狂抽近柱，洛里斯飛身單手撲到，個波中楣彈出
【00:15】熱刺 4:1 利物浦
紅軍後防炸彈多多都未炸晒，56分鐘熱刺右路罰球斬入禁區，米洛列特撲出少少，哈利卡尼被成班紅軍後衞圍住，都從容起到腳，4:1喇！
【23:50】【上半場完】熱刺 3:1 利物浦
熱刺、紅軍上半場對攻，利物浦後防漏洞今仗表露無遺，無論係祖高美斯定洛夫雲都心不在焉，頭12分鐘哈利卡尼同孫興民已搵到着數士哥。好彩紅軍之後憑沙拿單刀追番粒，先稍為止血。領隊高普稍後都頂洛夫雲唔順，將佢換走換入阿歷士張伯倫，打三個中堅，張伯倫、安利簡恩分別打左右翼衞，紅軍先打番好啲。但利物浦後防堅差，於半場前再輸多粒，面對對手罰球，客軍後防六個對住主隊三個都守唔住，畀迪利阿里抽射入網，半場熱刺領先3:1，下半場睇怕仲有得入。
【23:30】
29分鐘，熱刺一個直線又劏穿紅軍防線，孫興民埋門但過唔到米洛列特
【23:29】
28分鐘，利物浦左路大腳斜斬入禁區，沙拿趕到一頂，畀洛里斯接住
【23:16】熱刺 2:1 利物浦
佐敦軒達臣長傳畀穆罕默德沙拿追成1:2。
【23:16】熱刺 2:0 利物浦
孫興民右路窄位抽射中楣。
【23:12】熱刺 2:0 利物浦
洛里斯開出龍門球，洛夫雲竟然漏頂，畀哈利卡尼長驅直進，再橫傳禁區畀孫興民射成2:0。
【23:04】熱刺 1:0 利物浦
捷比亞右路妙傳，祖高美斯又包咗越位，哈利卡尼扣過出迎嘅紅軍門神米洛列特先開紀錄，弗到漏油。
【23:00】熱刺 0:0 利物浦
熱刺對利物浦開波喇。
【22:32】熱刺鬥利物浦陣已出，主隊派出全攻型陣容，除哈利卡尼外，孫興民亦正選落場，迪利阿里於歐聯停賽後今仗復出，配以基斯甸艾歷臣，戰鬥力一流。利物浦占士米拿於歐聯鬥馬里博爾後繼續正選，隊長佐敦軒達臣復出，全力協助穆罕默德沙拿、羅拔圖法明奴同菲臘比古天奴爭取入波。
熱刺正選陣容
門將：1洛里斯
後衞：4艾達韋列特、6達雲臣山齊士、5維頓漢
中場：4奧里亞、20迪利阿里、29哈利雲克斯、2捷比亞
前鋒：23基斯甸艾歷臣、10哈利卡尼、7孫興民
利物浦正選陣容
門將：22米洛列特
後衞：12祖高美斯、6洛夫雲、32祖爾麥迪比、18艾拔圖摩蘭奴
中場：14佐敦軒達臣、23安利簡恩、7占士米拿
前鋒：11穆罕默德沙拿、9羅拔圖法明奴、10菲臘比古天奴
【22:25】全場完 愛華頓 2:5 阿仙奴
蒙利爾回傳未夠力，施治解圍畀奧馬尼亞斯偷到個波追番粒，但轉頭輪到阿歷斯山齊士遠射埋齋，最終阿仙奴大勝5:2。
【22:18】愛華頓 1:4 阿仙奴
後備入替嘅韋舒亞妙傳「死神」艾朗藍斯射成4:1。
【22:11】愛華頓 1:3 阿仙奴
格列沙加遠程炮射中楣，差啲再整多粒。
【22:02】愛華頓 1:3 阿仙奴
奧斯爾右路橫傳，拿卡錫迪快射得手成3:1。
【21:56】愛華頓 1:2 阿仙奴
伊祖沙古爾掃跌格列沙加，兩黃一紅被逐，令落後嘅愛華頓要打少個。
【21:40】愛華頓 1:2 阿仙奴
阿歷斯山齊士左路挑傳，奧斯爾激罕地用頭槌頂破比克福特嘅十指關，協助阿仙奴反先。
【21:17】半場完 愛華頓 1:1 阿仙奴
雖然朗尼早段入靚波先開紀錄，但整個上半場都係阿仙奴佔盡上風，最終蒙利爾執雞扳平亦屬正路，又睇吓朗尼下半場會否再建奇功，搞寸阿仙奴主帥雲格68歲牛一大日子。
【21:14】愛華頓 1:1 阿仙奴
奧斯爾再畀靚波，但空晒嘅阿歷斯山齊士快射又畀比克福特封出。
【21:10】愛華頓 1:1 阿仙奴
格列沙加遠射被比克福特擋出不遠，蒙利爾殺上執隻靚死雞追平。
【21:01】愛華頓 1:0 阿仙奴
比利連遠射畀比克福特接實。
【20:42】愛華頓 1:0 阿仙奴
伊祖沙古爾於中場搶截得手，朗尼於禁區外遠射破網，呢個入波同15年射破兵工廠嘅靚波有幾分相似。
【20:37】
奧斯爾再斜傳畀拿卡錫迪窄位抽射，過唔到比克福特十指關。
【20:33】
奧斯爾妙傳艾朗藍斯入楔快射堅近磅，僅僅省到對方後衞出底線。
【20:30】愛華頓 0:0 阿仙奴
愛華頓對阿仙奴開波喇。
【19:40】愛華頓大戰阿仙奴陣容已出，拖肥背水一戰，朗奴高文倚重朗尼打正選，基菲爾施古臣從後支援；兵工廠有A山、奧斯爾、拿卡錫迪復出首發，剛於歐霸入金球嘅基奧特，以及翻生嘅韋舒亞就退居後備。
愛華頓正選陣容
門將：1比克福特
後衞：4米克堅尼、6菲臘積基爾卡、5艾殊利威廉斯
防中：43莊祖堅尼
中場：18基菲爾施古臣、17伊祖沙古爾、27尼高拉華錫、3巴尼斯
前鋒：10朗尼、29卡維特利雲
阿仙奴正選陣容
門將：33施治
後衞：6哥斯尼、4梅迪薩卡、18蒙利爾
中場：24比利連、8艾朗藍斯、29格列沙加、31哥拉辛拿斯
前鋒：11奧斯爾、9拿卡錫迪、7阿歷斯山齊士
東網體育同你追實體壇每個精彩時刻！