【港超專版】 樂楓咕嚕肉　挑機Chef Lemon

不知是否想成為「多功能」好男友，還是肩負「長子責任」的孝順仔，今季終於不用兼顧學業、成為職業球員的理文中場顏樂楓，近月突然重燃起兒時興趣──「煮嘢食」，只要不用練習或比賽，便會到爸爸和叔叔經營的潮州飯店學藝，務求早日學有所成，為爸媽和女友FunFun炮製十二道「楓」味，唔係Chef Lemon先勁㗎，Chef Lee Man一樣咁醒！圖/文：戴陶蔚

有云「只要工夫深，鐵杵磨成針」，但花名「光頭」的顏樂楓，為重視的人送上十二道「楓」味的目標，相信難以在短期內達成，事關該名中大運動科學系畢業生苦練多時，合格的就僅得「一道楓味」咕嚕肉。「我細個嗰陣阿爸已經係廚師，讀小學嗰陣佢成日都畀我試吓煮嘢，嗰時當然係煮啲簡單嘢，好似火腿炒蛋嗰啲，讚吓我話好食，我就會好開心、好有滿足感，慢慢就有咗興趣。不過，升上中學之後我開始掛住踢波，好少再攞起鍋剷同炒殼喇，依家煮番多啲，啲感覺慢慢返番嚟。」今季由傑志借用到理文的顏樂楓笑說。

「多功能」男友招牌菜咕嚕肉

網上不時有「絲打」喺討論區留言，指男友如具備識煮餸、煲湯或影相等「功能」，遠比富有吸引，如今「光頭」突然再次熱衷於學廚，莫非想提升「功能」氹愛人開心？「我唔否認叫阿爸教番我煮嘢食，其中一個目的係想煮嘢畀『FunFun』食，我哋係中學同學，又一齊喺中大畢業，拍咗拖9年幾，早已認定對方係成家立室嘅對象。但遲啲佢就會去外國讀書，向成為物理治療師嘅夢想奮鬥，我好想喺佢去之前，可以多啲試吓我嘅手勢。」嘩！Sweet到呢！難怪FunFun試味時，每啖咕嚕肉都只有甜味（有相有真相）。

孝順大仔邊踢波邊幫屋企

衰仔！一味掛住討女友歡心，對父母一點心肝也沒有？「冤枉呀！『包大人』，我咪講咗煮嘢畀『FunFun』食只係其中一個目的囉！阿爸同叔叔啱啱頂咗潮州飯店嚟做，同阿媽每日都好忙碌，我同屋企人一早有協議，就算我大學畢咗業，我都希望繼續以足球員做我嘅職業，阿爸同阿媽都好支持我。但我始終係大仔，唔敢講繼承父業咁偉大，有時舖頭忙起上嚟，起碼我都可以幫吓手。」只見「光頭」在父親「B哥」指導下，起烏頭骨和切鵝片等工序都似模似樣，十分抵讚。

上季依然要兼顧學業的顏樂楓，今季終於可以全心全意踢波，但在理文的出場機會，卻遠不及上季效力元朗，為此可有感到灰心？「出場機會不似預期，唔多唔少都有啲唔開心，但就未致於會灰心，我唔係第一年出嚟踢，好清楚唔同教練有唔同踢法，對用球員亦有唔同要求，我無辦法去控制教練嘅想法，我唯一可以控制嘅就係做好自己，準備好啲，一嚟就嚟，係唔係？」原來，昔日在場上會無故痛哭，因為自己表現欠佳而發脾氣的「光頭仔」，如今已是24歲的大男孩，「光頭」成熟了。

剛戰理文作客鬥傑志，顏樂楓後備入替後表現搶鏡，雖未能協助球隊扭轉敗局，但表現絕對值得換來更多上陣機會。「光頭」，努力呀！

食住撐港超！球員9折波飛換汽水

有到過「光頭」爸爸「B哥」經營的德發潮州飯店，相信未步入正門，便會被正門兩旁落地玻璃，貼滿了顏樂楓比賽照片的布置吸引。原來「B哥」不僅支持愛兒追尋足球夢，本身也是一名球迷，十分支持港超聯。

「好多時旺角大球場有賽事，散場之後，好多球迷同球員都會嚟食飯，我因為要開檔冇得入場，惟有聽佢哋講番場波嚟止渴，感覺都好開心。為咗吸引多啲球員、球迷嚟食飯傾波經，舖頭有一個優惠，就係所有港超球員嚟幫襯都會有9折，球迷只要攞住當日嘅港超聯波飛，都可以免費換汽水一罐，最緊要大家開心！」各位港超球員和球迷朋友，記住這個優惠啦！