【港超專版】拳霸？李毅凱：有火先有霸氣！

拚搏、熱血是年輕人的標記，效力香港飛馬的李毅凱享受拳擊帶來的拚勁、揮灑汗水的感覺，樂於被操到「爆廠」！足球場上「阿凱」同樣延續激情，「壞孩子」形象加上「火爆」性格，令他被球迷戲稱為「拳霸」，即使現時已學懂控制情緒，但他仍認為踢波一定要有火：「激情係因為想贏，有火先有霸氣！」

圖/文：袁志浩

作為防守球員，在場上與外援及入籍兵硬撼，本地球員體能及對抗性上難免輸蝕。李毅凱自上季中開始學打拳，由最初只想「練大隻」，到現時已被打拳所吸引：「打拳出晒汗又用到力，嗰種拚勁係我最鍾意，我好享受用盡全力嘅感覺。」不過即使「阿凱」有運動底，一開始亦被操到「爆廠」：「打拳嘅身體對抗性要求多過踢波，平衡同協調都好重要，例如每拳都保持速度同力量，好講求耐力，初初唔識去協調，剩係熱身都爆咗廠。最辛苦係做核心肌群嘅訓練，要我谷實腹部，被拍檔一拳打落嚟。初初都會驚同縮，但原來放鬆啲就冇咁驚，畀佢打落嚟先練到腹部嘅平衡，唔會令自己咁易被打低。」

欣賞「沙拉」有事第一個出頭

同樣道理，勇於面對困難或批評才是最佳處理方法。「阿凱」以往常發脾氣、做出不智行為，經歷多次被教練及外界批評，他反省後覺得「好蠢」，現時會不斷警惕自己，在控制情緒上已見進步。不過仍有球迷戲稱「阿凱」為「拳霸」，更有網民笑他不如轉行打拳，「阿凱」卻認為火爆源自激情，激情只因爭勝心，以及他引以為傲的義氣：「每個人落到場都想贏，認真起嚟就自然有火，火爆其實就係激情。我覺得自己係好有義氣嘅人，好球員Gentleman得嚟都要有霸氣，咁先有人服你，或者令對手驚你。我比較鍾意『沙拉』沙治奧拉莫斯，佢火爆但好識照顧隊友，無論有咩事發生，佢都第一個行出嚟，我就係想做呢種球員！」

省港盃踢到眼濕濕一世難忘

今年初的省港盃次回合，港隊雖然於主場戰和廣東，總比數落敗無緣捧盃，不過李毅凱就在下半場戴起隊長臂章，領導防線並跑足全場，展現無比鬥志，這仗更成為他心目中至今最激情的回憶：「嗰隊港隊差唔多全部都係土生土長嘅香港年輕球員，好有代表性，加上做隊長責任感更大，攞唔到冠軍係失落，但我哋打出拚勁同模式，隊友互相鼓勵，仲有好多球迷拍掌大叫『香港隊』，嗰刻好感動，覺得好光榮，呢一世都唔會忘記，係我第一次踢波踢到眼濕濕，我想話畀大家聽，我哋會繼續努力，下屆攞番個冠軍！」

踢出好成績報答屋企人

「球場拳霸」都有溫柔一面，小時候反叛性格令家人操心，長大後「阿凱」決心報答家人：「細細個屋企人唔支持我踢波，因為我讀書差，去到有少少成績，開始代表香港青年軍、出外比賽，佢哋先開始信任同支持。雖然佢哋好少現場睇我踢波，但每次踢完波我都會同佢哋傾吓，佢哋亦好緊張我嘅表現，平時有困難都會幫我，所以我要踢出好成績去報答佢哋，汗水就係金錢，你付出幾多就會收穫幾多，我踢波都係為咗佢哋。」

「Family」紋身畀自己最大動力

心繫家人令「阿凱」決定每場比賽都要帶着家人「上陣」，他在左手手臂位置紋上打氣中的家人剪影和「Family」一字（小圖），無時無刻給予自己最大動力：「我覺得自己比賽，唔只係一個人落場就算，想同屋企人分享落場嘅感覺，每個人都有自己嘅家，都會好錫自己家人，所以我將心意紋喺身上。」