【有片】推跌執波仔　冇品澳職仔等處分

即睇阿聯馬朗尼冇品推得執波仔：https://goo.gl/fnUhY6　

澳職足總盃決賽尋日打完，FC悉尼喺主場加時以2比1擊敗阿德萊德聯，場波由FC悉尼大熱捧盃，本來都冇乜特別，不過喺頒獎時候，只見有位小朋友企正頒獎台正中，陪同悉尼球員一齊攞獎。究竟呢個係乜水？原來佢係呢場波其中一位執波仔，事關佢喺比賽途中，畀心急開波嘅「阿聯」守將馬朗尼推跌，事後悉尼認真識做，安排呢位10歲執波仔同佢爸爸一齊上台攞獎補數。至於超冇品嘅馬朗尼，今日就收到澳洲足總通知，將要面對足總開庭聆訊處分。

話說場波當時係加時悉尼領先2比1，「阿聯」喺中場附近獲得一個界外球，馬朗尼就心急想喺個執波仔手上拎個波快開，點知對方就有少少疑似玩嘢擰轉身，最後馬朗尼就嚟招「熊抱」對個執波仔攬低。之後悉尼前鋒麥西蒙睇唔過眼要為執波仔出頭，即刻埋嚟將馬朗尼推開，雙方球員隨即互相推撞，幾乎大打出手，好彩最後大家都冷靜分得開，馬朗尼就領紅被趕出場。

澳洲足總今日就向馬朗尼發出一份紀律研訊通知，話佢因為「作出嚴重欠缺體育精神行為」，將要接受審訊，日期就有待通知喎！查實喺澳職就從未有先例可以參考，但喺英超呢，2013年車路士中場夏薩特就衰過類似行為，當時佢腳踢個執波仔，事後被罰停賽3場，睇怕今次馬朗尼停賽都係唔少得！

即上英超刨績王：http://win.on.cc/epl　

東網體育同你追實體壇每個精彩時刻！　

https://goo.gl/ewVpvE