【港超專版】鄭展龍：感激肯借我同借我出去

3個月前，各位球迷聽到「鄭展龍」這個名字，大部分只會想到「董之英」或「傑志青訓」；今天，同樣的名字已有不一樣的聯想，因為鄭展龍已成為夢想FC主力兼新進港腳。「感謝我8、9歲已跟佢踢波嘅『細榮』（即夢想FC主教練梁志榮）肯畀機會我，係唔係球隊主力我控制唔到，入選港隊更加諗都唔敢諗，我只係想有多啲上陣機會，踢多啲我先可以進步！」鄭展龍表示。

鄭展龍8、9歲便在當年的巴塞足球學校與梁志榮結緣，10年後兩人關係不變，依然是球員與教練，還有一點不變，就是「細榮」對「阿龍」的睇法。梁志榮說：「『阿龍』當年10歲已經入選香港U13，佢比同齡球員大膽好多，另外好靈活，保護皮球嘅能力好高。季前我向『朱Sir』（即傑志總教練朱志光）借用『阿龍』，就係希望佢嘅特質同能力可以幫到球隊。」「細榮」補充謂鄭展龍還有一個特點，多年來絲毫不變，就是少說話、多做事：「我有時嫌佢太靜，球場外OK，但球場內就唔可以太靜。」

雖然公認性格沉默寡言，但當談及今季的際遇，「阿龍」也按捺不住「健談」起來，他說：「我上季傷咗好長時間，曾經好擔心會畀人遺忘，甚至會喺球圈消失。所以我唔止多謝『細榮』借我，亦都好感激『朱Sir』肯借我出去，雖然我上咗傑志一隊兩個球季，但出場機會唔係咁多，今季喺夢想FC，如果我冇記錯，應該只係冇踢一場。踢多啲先會有進步，先會知道自己有咩能力不足，呢一刻我好清楚自己嘅射門能力麻麻，要努力啲先得，打前鋒入得1球真係少得滯。」

信任「朱Sir」「細榮」

那麼入選香港隊呢？「阿龍」坦言比成為球隊正選更加不可思議，他謂：「堅意外，始終我傷咗咁耐，入選已經冇諗過，仲要有機會後備入替，係一次好難忘嘅機會。」有觀看賽事直播的球迷，都可能發現「阿龍」賽後訪問時「口都震埋」，難道……「唔係呀！冇喊！只係好失望，咁難得入選仲要有踢，但自己表現唔係咁好，幫唔到隊波，有少少自責咁啫，我冇咁易喊嘅。」「冇咁易喊」卻很易嘔！多次在烈日當空下練習都嘔吐大作，因而被隊友取笑為「泡泡龍」。

最後被問及可有擔心季中被傑志收回，明年1月7日才滿20歲的「阿龍」表示：「冇得擔心，冇錯我喺夢想FC係有好多出場機會，但我始終係傑志球員，如果球會需要我，我都要返去。『朱Sir』同『細榮』都係我好信任嘅教練，就交畀佢哋去決定，我相信佢哋會幫我打算。我淨係想入多啲波，幫到球隊手。（入波要請隊友食飯喎！）冇所謂啦！請咪請！」

梁志榮：夢想FC好嘢唔止一個「泡泡龍」！

對於鄭展龍成為大港腳，「恩師」之一的梁志榮坦言感到高興，並認為「泡泡龍」具外闖的實力，他說：「當然唔係依家啦！但只要佢肯繼續努力，提升自己，有機會都可以試吓外闖，我睇住佢大，會盡力幫佢舖吓路。」

「細榮」亦提到麾下「好嘢」絕非只得一個「泡泡龍」，希望大家可以給予更多支持。「同『阿龍』一齊喺10年前就識我嘅『羅梓』（即羅梓駿），打到閘打到邊，跑343佢打左邊攻又見佢、守又見佢；夢想FC華人首席射手『Fat Gor』（即林衍廷）打中場瞻前顧後，自己搵食或者畀波都有錯表現，但其實佢踢中堅好好路數；『播磨』腳下功夫唔錯，亦好有膽色，只要自信心強番啲，場上發揮肯定更好；『馬騮』（即朱偉鈞）遠睇成個陳肇麒咁，佢身高1米85，但就鍾意上腳，最緊要練番大隻啲，我同『阿駒』(即夢想FC行政總裁梁智駒）都睇好佢會成為一個好出色嘅中鋒。」