【港超專版】外借坐正 陳嘉豪望見陽光

20171127
東網電視
更多新聞短片
在機緣巧合之間,最近幾季均在傑志擔任第3門將的陳嘉豪,今季外借予陽光元朗後,因為隊友受傷,令之前期望得到的機會提早來臨。霎時間成為球隊正選門將的他,儘管感到壓力,亦要決心向外界證明自己實力。圖/文:何彥霆
今季港超有謝家榮和陸平中等年輕門將冒起,持續為陽光元朗正選上陣的陳嘉豪,亦自然得到球迷及傳媒留意,「嘉豪」坦言要多謝隊友、教練團及傑志教練朱志光的支持︰「其實本身嚟呢度都係諗住等機會,因為阿門(門將彭梓鍵)受傷,呢個機會提早來臨,咁快踢正選壓力一定有,不過阿門同長哥(守門員教練梁卓長)一直鼓勵我,叫我放鬆啲、唔好咁緊張,因為一緊張就乜都做唔到。頭幾場都未習慣,會驚累球隊輸波,依家踢多咗感覺好好多,起碼出場嘅時候唔會怯咗先,有信心咗。同埋要多謝朱Sir,喺季前都有啲球隊對我感興趣,佢都有同我分析過去邊度最好。」
相比起兩年前代表香港教育學院(現為香港教育大學),奪得「中國大學生校園足球聯賽」校園組全國總冠軍,獲選賽事最佳守門員的陳嘉豪仍然覺得,自己首次踏足港超舞台的一刻比較緊張︰「始終嗰陣仲係青年軍嘅階段,又冇話特別緊張,大家都係同輩,但依家係職業足球,自己資歷最淺,無論節奏同速度都唔同晒,強度差好遠。今年第一年踢,自己始終冇經驗,喺比賽速度同力量都有增無減下,要喺判斷方面有所調整,如果用番以前嘅思維去做,可能已經犯咗錯。依家有嘅壓力係因為想踢得好,可以算係正面嘅壓力,同時隊友亦好支持我,為我帶來推動力,要做得更好。」
父母反對變入場支持
在香港要成為職業運動員,絕對不少得毅力與決心,陳嘉豪亦希望藉着今次意外得來的正選機會,換取父母對自己的支持︰「其實屋企人反對我踢波,佢哋擔心我前途,叫我讀完書就去搵工做,但係自己比較自私,冇乜點聽佢哋講。不過依家佢哋都有入場睇我比賽,態度開始軟化。其實我想證明自己唔係玩玩吓,想繼續踢落去,喺球圈裏做番啲成績出嚟。」