【港超專版】鄭兆均要步老友徐宏傑後塵

3年前還是一個「英華仔」，轉眼間鄭兆均已成為標準流浪及城市大學校隊主力，上月更於菁英盃取得入球，協助標準流浪贏冠忠南區2比1。在球會爭取表現之後，鄭兆均下一個目標就是追上好友徐宏傑一起入選香港隊。

圖/文：余樂詩

由流浪青年隊升上一隊後，「均仔」踢法漸趨成熟：「以前好鍾意扭波，踢職業隊之後，好多教練都話我扭得太多，可能做『One two』會較易入楔，依家已改善呢方面嘅習慣，用波多咗，扭波少咗，防守方面進步咗。」鄭兆均揚言，今季目標希望聯賽入5球，能夠跟好友徐宏傑躋身大港腳更是他的最大心願：「好希望可以追上傑仔，一齊踢香港隊，因為我哋一直都係踢同一隊㗎！」

阿歷斯山齊士說過：「如果我唔踢波，可能去咗採礦。」現就讀城市大學康樂及旅遊管理副學士的「均仔」則是香港典型學生哥：「讀完Asso，就會駁上Degree。」對鄭兆均來說，「唔踢波，世界就只有讀書。」目前「均仔」除了聯賽，亦要兼顧大專賽，第一場便轟入12碼，協助城大贏樹仁4比0：「城大去年成績普通，今年目標係要重奪大專冠軍！」

周六對理文誓搶3分

「我最欣賞山齊士，又勤力又幫到隊波，佢好注重態度方面，輸波都會加操練跑。」鄭兆均的偶像是阿仙奴的阿歷斯山齊士，為求達至最佳狀態，這位20歲翼鋒訓練時亦會主動跑圈，相當勤力。標準流浪目前以1勝4負排榜尾，不過「均仔」仍未絕望：「球隊輸波總會有啲失落，但比起失望，我自己更傾向以積極態度面對之後嘅比賽，想入波幫球隊贏番。」周六（2日）對理文的「榜尾大戰」，他直言：「一定要贏，呢3分好重要！」

狄恩睇好必成大器

標準流浪被稱為球壇「壞孩子」集中地，鄭兆均卻表示，球隊紀律問題已大有改善：「狄恩教練注重態度多過球技，依家隊內遲到問題都冇咁嚴重。」同時，狄恩亦對鄭兆均「有讚冇彈」：「我認為佢好有潛質，我深信佢不久將來可以踢大球會，當然要繼續努力，每一場都要落力證明自己。我對鄭兆均充滿信心，直頭係100%！」

感激女友默默支持

長情至極的「均仔」原來不只對球會專一：「女友每逢得閒就會嚟睇我比賽，就算嚟唔到都會睇直播。多謝佢一路以來咁支持我，冇因為我掛住踢波而嬲嬲豬。」6年來女友Yukki一直支持自己的足球夢：「有時紀念日撞咗練波、比賽就求其食餐飯算數，但佢都冇話介意，多謝佢。」