英超　夏神發威　車仔主場鏟鵲

夏神省2粒揸車輾「鵲」！周六英超頭場，車路士憑「夏神」夏薩特梅開二度，連同「頭槌王」艾華路莫拉達再建「頭」功，喺主場以3比1反勝紐卡素，近5次聯賽主場對紐卡素贏晒，史丹福橋球場果然係「喜鵲」凶地。

紐卡素主帥「肥賓」賓尼迪斯，曾喺2012-13年度中途接手車路士，仲帶隊捧走歐霸盃，今仗佢重返史丹福橋倒戈相向，初段係威係勢，開波僅12分鐘，車仔左翼衞馬高斯阿朗素回傳唔湯唔水，雖然門將泰拔高圖爾斯快積及梅菲一步撲出，但杜韋加爾即衝前補射先開紀錄。

車仔失波即如夢初醒，21分鐘艾斯派古達右路傳中，紐軍守將解圍不遠，「夏神」夏薩特後上快射扳平，得勢不饒人，12分鐘後艾華路莫拉達接應域陀摩西斯妙傳，有推人之嫌下門前頂成2比1反先，呢球唔單止係佢今季聯賽9個士哥中，第5次用頭槌入波冠絕英超，計埋上季在內，呢位西班牙箭頭合共有11個頭槌士哥，比同期5大聯賽任何球員更多，認真犀利。

易邊後車仔刻意收油，控住個波睇定先食，搞到「喜鵲」谷極都谷唔起，去到71分鐘，域陀摩西斯殺入禁區被馬特列治掃跌，球證直指12碼，夏薩特堅招積射中間破網整多粒。紐卡素愈輸愈慌，之後中場舒維爾中場交失波，莫拉達直傳畀「夏神」幾乎連中三元，可惜過唔到出迎嘅客軍門將卡爾達路，最終車仔贏3比1，連盃賽在內近6仗錄5勝1和，近5次聯賽主場對紐卡素贏晒，史丹福橋球場果然係「喜鵲」凶地。

東網體育同你追實體壇每個精彩時刻！