ABL　東方奧尼爾：年齡只係個數字！

6舊「朱古力」加上強勁胸肌，43歲的香港東方巴哈馬外援中鋒萊恩奧尼爾（Moss）依然睇得又打得，戰鬥力比起一眾年輕20歲的當打球員亦不輸蝕。今季最後一刻獲球隊註冊為「世界外援」、出戰東南亞職業籃球聯賽（ABL)或曾令球迷跌眼鏡，不過去仗他用表現證明年齡只是數字，究竟這位外援弗到漏的背後會有甚麼秘密？

兩周前於ABL迎戰菲律賓火焰處子登場，Moss以43歲零7個月之齡成為ABL史上年紀最大的上陣球員，尾段關鍵性地連續兩次封阻及搶得4分，體能比起當打球員有過之而無不及，擁有弗爆身材的他原來一日會做約4、5小時健身，他表示自己曾修讀健康科學，一講起「Keep Fit」更金句盡出：「健康同體能係最好嘅投資，其實比賽並唔係喺場上，而係睇你喺場外做嘅工夫有幾多，所以我每日會做最適合嘅訓練，會食最有營養嘅食物，呢個就係我嘅身體可以帶來驚喜嘅原因。你唔可能付出最少但收獲最多，當你照顧好自己嘅身體，你嘅身體亦會照顧番你！」

心態年輕的Moss只視年齡為一個數字，眼中只有機會。即使去仗表現引起高度評價，不過「老江湖」Moss早已「清心寡欲」：「嚟香港之前，我都有信心可以再踏上比賽舞台，因為我100%付出。其實我係邊個、得到表揚都唔重要，最重要係做到球隊需要我做嘅嘢，亦感激球會畀機會我，呢個可能係我人生清單上嘅最後一個剔！」

掛念家人更添動力

Moss一向是隊內的「開心果」，在訓練場上不難看見他露出雪白的牙齒、咧嘴大笑，一講到堅持籃球路的原因，他卻即時變得嚴肅：「是家人吧。」原來Moss的太太及一對子女現時定居荷蘭，社交網上盡是3位「心肝」的照片，問到他與家人相隔多久才見面，Moss嘆一口長氣後說：「一段好長嘅時間……作為一位職業運動員，責任係專注籃球上面，不過我每日都好掛住佢哋。」退休，Moss透露這個念頭已在腦中出現過多次，但他認為自己仍有足夠「戰鬥」能力，期望在這舞台上拚至最後一刻。

東網體育同你追實體壇每個精彩時刻！

http://bit.ly/2ecTF2A