總結:騎士11連勝迎接湯馬士復出

20171203
東網電視
更多新聞短片
湯馬士好快可以復出幫助勒邦占士(左圖左)。(互聯網圖片)
騎士喺NBA主場以116:111擊敗灰熊,勒邦占士取得全場最高嘅34分,包括第4節攻入13分統治比賽,帶領騎士完成11連勝。美國傳媒仲話,加盟後一直養傷嘅湯馬士,已經接近傷愈,好快可以正式同騎士球迷見面喇!
其實騎士半場領先14分,但由於佢哋喺第4節被追近分數,結果要勒邦占士開動統治模式,全場取得34分、2個籃板同12次助攻,包括第4節攻入13分,連續殺入籃底博到犯規或者直接得分去致勝。另外,路夫有20分、11個籃板同2次助攻都係贏波功臣。
仲有呀,據講湯馬士已經恢復投籃訓練,即使佢暫時唔能夠進行對抗性練習,距離傷愈復出已經唔使等太多時間,估計好快就可以重返球場。至於馬克加素,就有27分、6個籃板同4次助攻,同時職業生涯得分突破1萬大關,可惜阻止唔到灰熊11連敗。
同日,太陽作客以111:116不敵塞爾特人,布克取得全場最高嘅38分,兼且有4個籃板同5次助攻,可惜即使係咁,最後太陽都要遭遇2連敗,因為艾榮有19分同5次助攻,同時有5個隊友得分達到雙位數字,造就塞爾特人取得2連勝。
最新賽果(左方主場)
塞爾特人 116:111 太陽
小牛 108:82 快艇
籃網 102:114 鷹隊
騎士 116:111 灰熊
76人 108:103 活塞
公鹿 109:104 帝王
金塊 115:100 湖人
拓荒者 116:123 塘鵝
東網體育同你追實體壇每個精彩時刻!