【港超專版】前中後踢勻晒最Like搞破壞

2017年12月04日 23:08
東網電視
更多新聞短片

理文左閘韋健豪(Marco)8歲開始接觸足球,14年來幾乎踢過前中後所有位置的他,坦言傾向打防守,皆因喜歡破壞對手進攻的感覺。今季港超聯不少小將上位,下一個會是周身刀的「通天老倌」韋健豪嗎?圖/文:何彥霆

現年22歲的韋健豪,從8歲開始接觸足球,並由10歲起接受正統訓練,目前主要出任球隊左閘的他,原來幾乎踢過場上每一個位置︰「一開始踢波係打前鋒先,跟住有段時間貪玩守過龍門,之後打翼鋒,去到中學出任防中,預備組試過踢中堅,跟住喺球會一隊開始時踢翼鋒,之後打閘,所以真係咩位都踢過晒!其實我自己比較傾向打防守多啲,好鍾意破壞人哋進攻嗰種感覺!」

自認EQ低多得隊友鼓勵
Marco亦坦言,曾擔心過自己未能找到最佳位置,但最後得出的結論是擔任「通天老倌」利多於弊︰「其實有諗過可以踢多個位置會唔會『周身刀,冇張利』,但係正面啲諗,可以踢多啲位置變相令自己有多啲上陣機會,所以可能係好事。」

雖然Marco至今在球員職業生涯未有大突破,但他仍不忘在訪問中向一眾隊友們致謝︰「我係一個情緒波動大嘅人,有時有啲負面嘢出咗嚟,無論係足球定其他層面,我就會亂諗嘢,影響表現。幸好身邊有好多人會鼓勵我,好似『阿仁』(羅俊仁)、『軒仔』(黃駿軒)、『余沛』(余沛康)同埋上年一隊隊友鄭兆均、『阿傑』(徐宏傑)同『Bobby』(郭子堦)都好鼓勵我,好慶幸當自己轉牛角尖,情緒低落嘅時候,有佢哋喺我身邊,拉番我上嚟!」

談到短期目標,Marco希望能夠在理文獲得常規正選位置︰「相比起上季同『張峰』(張健峰)做隊友,今季喺理文確係多咗機會,因為『張峰』經驗豐富,即使喺佢身上學到好多嘢,但我上陣機會就唔多。理文呢度有好多年輕球員,好多時都係睇邊個狀態好就邊個有得踢,屬良性競爭,希望嚟緊可以喺球隊站穩陣腳。」

德港混血兒難忘世盃持旗
韋健豪雖是德港混血兒,但唯一前往德國的一次,竟是2006年於香港贏得選拔賽後,獲得在德國世界盃擔任持旗手的機會︰「當時好似讀緊小六,我嗰陣唔係好認識德國,不過始終第一次踏足自己家鄉,都開心嘅。我好記得嗰場係8強嚟,德國對阿根廷,一路綵排都冇事,但正式揸住支旗出去時就好緊張,因為成個柏林球場坐滿晒人,球迷打氣聲好誇張,自己好驚有乜甩漏,好彩最後都冇事。」

Marco坦言希望能夠再到德國︰「我爸爸係德國人,但我喺香港出世,唔識德文,之前學過,但學到一半就冇繼續,依家讀完書都想學番,同埋想去當地認識吓嗰邊嘅文化。」