【港超專版】介紹番！海鮮達人梁子駿

他，曾經在船上生活，每日乘風破浪，縱橫四海；他，每次出海絕不會空手而回；他，滿載而歸後便會返到長洲，休養生息，看準機會才再出擊；他，並不是紅旗幫首領張保仔，而是相貌跟飾演張保仔的藝人洪永城餅印一樣、現效力冠忠南區的中場球員「握手哥」梁子駿。

在長洲成長的梁子駿，年紀細細便跟父親「怪叔」出海捕魚，許多時一出便是三個月，絕對是「咩風浪未見過呀？」「細個唔識驚，其實出海捕魚，撞正大風大浪都幾危險，漁民呢行飯都唔易食，所以阿爸阿媽養大我哋3兄弟妹都幾辛苦。」談及童年往事，一向嬉皮笑臉的「握手哥」也感性起來。

唔熟唔做！開飯店入靚貨

常聽到有人說「我食鹽多過你食米」，但「子駿」就會說「我食海鮮多過你食米」。「咁又無咁誇，但我自細就好鍾意食海鮮，依家連我兩個仔無魚蝦蟹唔肯食飯，哈！哈！」「握手哥」笑說，由於雙親和他三兄弟妹都極度愛吃海鮮，故早2年家人決定創業，一於「唔熟唔做」決定經營海鮮飯店。「係呀！我哋識食自然識得入靚貨，做咗一段日子，啲客人知道我哋嘅背景後，就更加信任我哋，好多客幫襯過一次覺得信得過、抵食都會返轉頭。（老細，好生意喎！）我佔好細份，阿妹『Toby』同妹夫『阿輝』先係大股東，佢兩個好畀心機去經營，做得好好。」

既然是海鮮食家，可有甚麼時令推介給港超聯的球迷？「梗係有！舖頭依家熱賣緊幾款時令海鮮，我成日都心思思想食，好似貴妃蚌咁，肉質係咁多種貝殼類入邊最鮮甜嘅，一年四季都啱食，但要識揀，唔一定大隻就正，要攞上手重手嘅。至於食法我首推鹽燒，一個字：『好食』。另外琵琶蝦嘅肉質同龍蝦好接近，攞嚟做刺身或者薑蔥炒，好好食。揀琵琶蝦一定要攞上手，新鮮嘅會成隻硬晒軚，登到衡晒。」

「握手哥」講得頭頭是道，最後還要作出終極推介，他說：「南非鮑魚亦係我最愛，但揀嗰陣要留意，揀啲啜到個缸好實，攞起篤佢會縮埋一舊嘅，咁就新鮮喇！不過，呢樣我一定會返舖頭食，因妹夫嘅秘製日式炆法好正，第度食唔到，大家有時間真係要嚟試吓。」如此懂得把握機會賣廣告，怎能不來幫襯呢？

孝順波牛退役即幫屋企手

雖然雙親「怪叔」和「蚊姐」一直經營海鮮生意，但「子駿」從小除了食之外，對生意根本丁點兒興趣都沒有，一心只向足球方面發展。

惟隨着兩個兒子漸漸長大，「子駿」心態亦有轉變：「後生嗰陣冇諗過理家中生意，因為我只鍾意踢波。但我兩個仔慢慢大，我開始感受到做父母嘅辛苦，阿爸阿媽湊大我哋3個一啲都唔易，我係大仔，唔可以由得佢哋辛苦落去。我打算將來退役後就會幫番屋企手，唔係，應該係幫細佬手，因為佢已經開始接手，仲做得好好添。」

不過，「握手哥」強調尚未為退役定下時間表，目前只會全心全意為冠忠南區爭取成績：「呢2季幾喺冠忠南區，我踢得好開心，同隊友、會方都相處得好好，可惜嘅係球隊仲未捧到盃，我好希望可以盡快達成呢個全隊嘅目標，到時先再諗幾時退役啦！」