【有片】射失12碼會點?背脊有支AK47

20171214
東網電視
更多新聞短片
里約嘅貧民窟足球賽事有人拎住AK47。(互聯網圖片)
睇片即到:http://bit.ly/2yrnqDP 
踢波啫唔係搵命搏呀?英國《每日鏡報》爆料,最近喺巴西里約熱內盧進行嘅1場足球賽,去到互射12碼階段,負責主射嘅球員背脊,竟然有條友拎住重型槍械AK47望到實,網友話,好難想像主射嘅球員壓力有幾大,同埋射失到底會點!
據知呢場係里約嘅貧民窟足球賽事,雖然有球證,但觀眾喺互射12碼嘅時候,可以圍晒埋龍門旁邊,正規極都有限。但最估唔到係,現場有人拎住AK47,都唔知佢想提醒主射嘅球員一定要入,定抑或想警告對方守門員,唔想死就唔好多手撲個波出嚟。
好彩最後主射球員生性抽入,而且拎住AK47嗰位,仲加入埋身邊嘅群眾一齊湧埋去慶祝,兼且向天開槍贈興,總算係冇引發慘劇。至於網友就話,原來巴西足球係咁樣練番嚟,難怪佢哋咁勁,可以拎到5次世盃冠軍喎!
東網體育同你追實體壇每個精彩時刻!