香港隊　司徒文俊：外籍教練嚟講好難得

香港足球總會周三（27日）正式公布與香港足球代表隊主帥及技術總監金判坤「Kim Sir」提早解約。香港足球總會副主席貝鈞奇表示可惜：「都有啲可惜，佢服務咗咁耐，中國人有一個句說話：『天下無不散之筵席』。我相信唔難交接，唔會話一個教練離去而影響。相信啲球員踢慣踢熟，呢兩年世界盃外圍賽、亞洲盃外圍賽都打得有啲表現，相信都唔會有咩影響。」

而曾與「Kim Sir」共事的東方龍獅主教練司徒文俊，讚「Kim Sir」領軍有方：「外籍教練嚟教代表隊，而做到個效果係無咩幾多個，『Kim Sir』算係做得較好嘅一個，佢唔係淨係顧住香港隊就算，喺技術層面同青訓方面都有顧及到，當然有好成績、有唔好成績，高、低潮一定會有，但總括而言係好嘅貢獻比較多。」

對於下任人選的條件，「司徒Sir」坦言會存在不少困難︰「我始終覺得要搵啲有心有力嘅外國教練係困難嘅，球會又好、代表隊又好，搵外國教練返嚟又要教得好、有成績同時有前景係好少好少。當然香港環境吸唔吸引到一啲好嘅外國教練都係一個因素；而本地有幾多個教練可以handle到、有一個長遠發展，又係另一個issue，所以要選擇代表隊主教練，往往都係一個好大問題。」