莫拉達繼續曳 車仔又失分三哥位危

20180114
東網電視
更多新聞短片
(Getty Images、法新社圖片)
即上英超刨績王:http://win.on.cc/epl 
車仔連和4場,干地堅要諗吓計!周六英超車路士主場迎戰李斯特城,主隊雖然夫添出擊,但近期狀態低沉嘅前鋒艾華路莫拉達繼續冇腳好波,於前線形同虛設,犯規多過射門,累主隊火力疲弱不堪,若非門將泰拔高圖爾斯上半場連番靚救,車仔分分鐘1分不保。最後車仔同狐狸悶和0:0,連續2場聯賽失分,再唔爭氣三哥位隨時冇埋。
車仔於之前3仗全數和波,當中包括2和阿仙奴,以及於英足盃摸和諾域治,連埋今仗同李城互交白卷,勁慘連和4仗。雖有主場之利,但車仔被李斯特城反客為主,上半場初段占美華迪、岡崎慎司及尼迪迪先後有入肉攻門,其中尼迪迪近門勁頂,高圖爾斯反應勁快飛身救出,認真夠卡士。
換邊後李城依然打得進取,但68分鐘芝維爾2黃1紅被逐出場,令車仔終於有啲起色,不過莫拉達始終踢極唔起,車仔去到補時先有馬高斯阿朗素罰球較具威脅,但卻過唔到卡斯柏舒米高,雙方窿窿完場,車仔接連3場入唔到波,目前23戰積47分,若周日深夜利物浦擊敗曼城,就可以較佳得失球差,搶走車仔三哥位置。
東網體育同你追實體壇每個精彩時刻!