完了吧如無意外！實力榜騎士跌到第9位
20180116
東網電視
更多新聞短片
勒邦占士取得32分、8個籃板同6次助攻。(互聯網圖片)
騎士喺NBA主場以108:118不敵勇士，即使勒邦占士攻入32分，都只能夠頂到3節，阻止唔到球隊遭遇4連敗，而且聯盟最新實力榜顯示，其實騎士已經跌到第9位，根本同第1位嘅勇士冇得比，甚至連巴克利都睇衰佢哋，入唔到季後賽總決賽添！
雖然路夫有17分、7個籃板同3次助攻，湯馬士有19分、1個籃板同4次助攻，數據唔算太差，但就算勒邦占士使出洪荒之力有32分、8個籃板同6次助攻，包括試過強力封阻咖喱仔同KD，騎士始終喺第4節被甩開，去到比賽尾段甚至要換走主力投降。
相反，史堤芬居里有23分、4個籃板同8次助攻，杜蘭特有32分、5個籃板同8次助攻，奇利湯臣有17分、4個籃板同2次助攻，協助勇士連贏3場，兼且完成作客13連勝，繼續喺NBA實力榜排第1位，好有機會再攞總冠軍。
另一方面，騎士喺實力榜跌到第9位，唔止塞爾特人、速龍、火箭、木狼同馬刺排名好過佢哋，就連熱火同巫師排名都高啲，搞到巴克利睇衰騎士入唔到季後賽總決賽，仲話依家嘅勇士勁到，歷史上得96年公牛同82年塞爾特人有得揮呀！
Follow東網體育IG一齊撐本地運動員！
東網體育FB同你追實體壇每個精彩時刻！