港超聯　和仔擔正：球員大個仔唔使錫錫

東方龍獅周五（19日）宣布已接納主教練司徒文俊之請辭，轉由李健和掌帥印至季尾。李健和周六（20日）下午於九龍仔公園完成「坐正」後的首課操練，表示球隊氣氛轉好，但大家都不捨得「司徒Sir」：「職、球員由開季以嚟一直都好支持『司徒』嘅工作，今年開季成績唔係咁好，最主要因為部分主力受傷，無形中產生咗唔少壓力。我諗『司徒』都受外間好多壓力，佢始終係比較年輕嘅教練，未必可以長時間承受咁大壓力，終於頂唔順要轉一轉環境，呢層我哋理解嘅，但係覺得有啲可惜。」

球隊正積極備戰下周二亞冠盃外圍賽第二圈賽事，李健和表示球隊短時間踢法上不會有太大變化，更謂有信心重振球隊士氣：「當然有信心！我哋所有球員都好專業，每一個都清楚跟住落嚟要做啲咩、每一場波付出幾多。呢一刻都係做返正常嘢，個個都大個仔啦！唔通仲要埋去攬住佢啜一啖咩！」

至於東方隊長葉鴻輝認為上仗以1比8不敵傑志球員責任更大，希望球隊可重拾士氣：「係我哋無好好表現應有水準，嚟緊我哋自己心態要調整，每個球員都要忘記上一場敗仗，努力面對將來嘅事。」